Ngamashu amane amaqela aza kuswantsulisana kube nzima kwitumente yombhoxo ekuthiwa yiMoko Easter Tournament eza kuqala ngePasika ukuya ngomhla wamshumi amabini ananye kule nyanga kaTshazimpuzi.
Image: Moko Facebook
Indodana yaseQonce edumene ngokudlala umbhoxo kwinqanaba eliphezulu, uLukhanyo Am, icela abantu baxhase ngobuninzi iMoko Easter Tournament ebekelwe umhla weshumi elinesibhozo ukuya kumhla wamashumi amabini ananye kule nyanga kaTshazimpuzi 2025.
Kunyaka wesine wale tumente eququzelelwa yiMoko Sports Foundation kulindeleke inqwaba yamaqela ombhoxo aza kuswantsulisana kuqhum' uthuli eMoko Sports Complex kwindawo ekuthiwa kuseZihlahleni. Ngamaqela ombhoxo aqikelelwa kumashumi amane alindelekileyo kwenye yeetumente eziqaqambisa italente yabadlali basezilalini nasezilokishini.
Onke amaqela aza kuvunyelwa asebenzise abadlali abathandathu abangaphezulu kwamashumi amabini anesihlanu eminyaka ngokungafaniyo nangaphambili. Ziinguqu ezenziwe ngabaququzeleli kuba bezama ukunika ithuba lokudlala abantu bonke abanomdla. ULukhanyo ucele amaqela nabathandi bombhoxo ukuba baxhase iMoko Easter Tournament eza kube sisigqubu solonwabo iintsuku ezine zonke.
"Njengoko nisazi, ngePasika siza kube sonwabe sonke emidlalweni esiyiphathelwe yiMoko Sports Foundation. Sicela nize ngobuninzi benu. Namaqela ombhoxo anomdla makabhalise. Yitumente yophuhliso entle kakhulu le kulutsha," utshilo uLukhanyo Am ongomnye woophopho emdlalweni wombhoxo kwihlabathi lonke.
Abadlali abasakhulayo ambhoxweni baza kufumana ithuba lokuzigqamisa nelokubonwa ziintlola zetalente eziphuma kumaqela aseMpuma Koloni ngokwahlukana kwawo. Ngaphezulu kokuba ulutsha luza kuhlangana ndawo lonwabele umdlalo oluwuthandayo, amaqela aza kube esilwela ukuphumelela indebe ekhatshwa ngamashumi amahlanu amawaka erandi (R50.000).
Iqela eloyisakele emdlalweni wokugqibela liza kosulwa iinyembezi ngamashumi amabini anesihlanu amawaka erandi (R25.000). Kanti namanye amaqela akwindawo yesithathu neyesine aza kufumana kwenye yeetumente ezinkulu kwiphondo leMpuma Koloni.
Related Topics: