ISebe lezeMidlalo, uLonwabo, ubuGcisa neNkcubeko libambisene neSebe lezeMfundo, bathumele abadlali bezemidlalo abakwikhulu elinamashumi amathathu anesine (134) ukuba baye kumela iphondo leMpuma Koloni kukhuphiswano lukazwelonke lwezemidlalo lwezikolo, iNational School Sport Athletics Championships, ukususela ngomhla wesibini ukuya kowesithandathu kuTshazimpuzi 2025 eBloemfontein.
Othethe egameni leSebe lezeMidlalo, uLonwabo, ubuGcisa neNkcubeko eMpuma Koloni, uAndile Nduna, uthi iqela laseMpuma Koloni lichongwe kukhuphiswano lwephondo, iProvincial Athletics Championships, ebibanjelwe kuKomani kwinyanga ephelileyo kweyoKwindla 2025.
"Eyona njongo iphambili yenkqubo yemidlalo yezikolo kukuqinisekisa ukuba izikolo, zamabanga aphantsi nezamabanga aphakamileyo, zinikwa ithuba lokuthatha inxaxheba ubuncinane kumdlalo omnye wezemidlalo.
"Le nkqubo ijonge ukujongana nayo yonke imiqobo ethintela ukungena kwimidlalo yesikolo ngoku ngokubonelelwa ngezinto eziyimfuneko, abantu abaza kunceda, kunye namathuba okhuphiswano," utshilo uNduna.
Le midlalo iquka ezi ndidi zilandelayo: Junior (ASA U/20), Youth (ASA U/18), Sub-Youth (ASA U/16), ulutsha nabafundi abaneemfuno ezizodwa zemfundo (abangevayo ngeendlebe nabo bakhubazeka ngokwasengqondweni).
Abadlali bezemidlalo baza kuthatha inxaxheba kwimidlalo, efana neLong Jump, Triple Jump, High Jump, Pole Vault, Shot Put, Discus, Javelin, Hammer kunye nokubaleka imigama ephakathi kwe100m ukuya kutsho kwi3000m kuquka neeRelays neeHurdles.