uArthur Zwane , oqeqesha AmaZulu, unexhala lokungafiki kwindawo ayifunayo ngenxa yokubethwa kweqela lakhe emidlalweni yeBetway Premiership.
Image: Yanga Nothanga/Maya Images
Umqeqeshi oyintloko, uArthur Zwane, uvakalise ukungonwabi kwakhe emva kokuba AmaZulu engawuphumelelanga umdlalo obuseMonti. AmaZulu agoduke ephaca emva kokubethwa yiChippa United ngamagowuli amabini kwelinye emdlalweni weBetway Premiership obuseBuffalo City Stadium emalanga ngoMgqibelo odlulileyo.
Ukungafumani amanqaku amathathu kuvimbe Usuthu ithuba elihle lokunyukela phezulwana. Emva komdlalo, bekunzima kuZwane ukuchaza unobangela wokubethwa kweqela lakhe. AmaZulu ngawona adlale kakuhle ngaphezulu kweChippa United ebidlalela eMonti okokugqibela kule sizini.
Umahluko othe waqapheleka kukuba iChippa iwasebenzisile amathuba amabini ewafumeneyo kwisigaba sokuqala somdlalo. Adlale odwa AmaZulu kwisigaba sesibini somdlalo ngoba iChippa ikhusele amagowuli wayo.
UDarren Johnson uye wafumana iwonga lomdlali oqaqambileyo ngoba ngoyena mdlali owayebalasele ezipalini kwicala leChippa United ehleli kwindawo yethoba kwiBetway Premiership. Ethetha neentatheli emva komdlalo, uZwathe uthe AmaZulu agxeleshe ukuvala isizini kwindawo yesine - kodwa amathuba okuyifumana la ndawo ayatshabalala emva kokuba iqela lakhe lingakwazanga ukuphumelela emidlalweni emine ilandelelana.
AmaZulu ahleli kwindawo yesixhenxe emva kokuzuza amashumi amathathu amanqaku emidlalweni engamashumi amabini anesine. "Bekufanele ukuba siyibethile iChippa ukuze sibethelele indawo yethu kumaqela aphambili," utshilo uZwane edanile.
"Siphakathi kwiTop-8 kodwa indlela ekufakwe ngayo amagowuli ibeka uxinizelelo phezu kwethu. Namhlanje sinike iChippa amanqaku ukuze isondele kuthi. Ukuba asikwazi ukuphumelela umdlalo ozayo, amathuba okufumana indawo yesine aza kuncipha ngoba sinomkhwa ombi wokuzibetha," utshilo uZwane.
AmaZulu aza kuzama ukulungisa izinto xa edibana neRichards Bay emdlalweni olidabi lobukhaya oza kube ungoLwesihlanu ngorhatya eMoses Mabhida Stadium. Ukuba aphumelele, kungavuseleleka ithemba kwakhona.
Related Topics: