ICape Town City ilwela ubomi bayo kwiBetway Premiership emva kokungaqhubi kakuhle kule sizini ethambekileyo.
Image: CTC/Facebook
Elinye lamaqela aphambili ebholni yaseMzantsi Afrika, iCape Town City, aliqhubi kakuhle konke konke kule sizini. Nangona kunjalo umqeqeshi walo omtsha, uDiogo Peral, unethemba lokuba uza kulisindisa ezembeni elijingayo. Xa kanye kushiyeke ibathwana lemidlalo kule sizini, iCape Town City izibhaqa ikwindawo yeshumi elinesine.
Oku kwenzeke emva kokuba ibambene ngeqanda neSuperSport United esokolayo nayo emdlalweni weBetway Premiership obubanjelwe eNew Peter Mokaba Stadium ngempelaveki egqithileyo. UPeral uxhuzula imikhala emva kokuxgothwa kuka-Eric Tinkler noMuhsin Ertugral ngokulandelelana.
Into ebangele iCity ibe kwindawo ekuyo kukuba isiqalo sayo kwisizini eqhubekayo besisibi kakhulu. Wahamba uTinkler kubonakala ukuba kunzima. Iingxaki kukuvuza kweqela nokungafaki amagowuli ngokwaneleyo. Isiqalo sikaMuhsin Ertugral sasithembisa ekuqaleni emva kokubetha iChiefs nePirates ngokulandelela ekuqaleni kwalo nyaka - kodwa emva koko kwaye kwakubi ngakumbi wade wasuswa naye.
Ukusukela ngonyaka (2016) awayisungula ngayo uJohn Comitis, iCape Town City zange yasendaweni embi njengakule isizini. Amanqaku amathathu ePolokwane ebeza kwenza umahluko omkhulu - kodwa kuye kwanyanzeleka ukuba iCity ibuye nelinye kuphela. UPeral uqinisekile ukuba unabadlali abaza kulisindisa iqela lakhe.
"Ndiyazi ukuba sineqela elinawo amandla okwenza umsebenzi esijongene nawo. Futhi ndiyazi ukuba imidlalo uyaphela - kodwa ndiyafuna ukubabona abadlali bedlala ngendlela elindelekileyo," utshilo umqeqeshi emva komdlalo. "Siza kuzama ukulwa xa sidlalela ekhaya. Sifuna abadlali bethu banyuse umxakatho ngoba ngumsebenzi omkhulu lo esijongene nawo singabaqeqeshi. Iyasiphazamisa imeko yeqela.
"Sizibonile iingxaki zethu. Kufakwe amagowuli amaninzi kuthi sabe singakwazanga ukufaka amagowuli thina. Sinethemba lokuba siza kusinda ezembeni futhi sakube sinezinto esizifundileyo kokwenzekileyo," utshilo uPeral oza kuncediswa nguLebogang Manyama noRoger de Sa onamava kakhulu ebholeni ekhatywayo. ICity iza kwamkela iSekhukhune United emdlalweni oza kube useKapa emalanga ngeCawe.
Related Topics: