UManqoba Mngqithi , ongumqeqeshi weGolden Arrows, akavumi ukuba kulula ukubetha iKaizer Chiefs ayibethe okwesithathu eMoses Mabhida Stadium kwiveki ephelileyo.
Image: GA/Facebook
Xa kuthethwa ngomqeqeshi okwazileyo ukukhubekisa abalandeli beKaizer Chiefs, kuxelwa uManqoba Mngqithi. Kule sizini yodwa, uyicambalalise kathathu. Uyibethe kabini esengumqeqeshi weMamelodi Sundowns phambi kokumgxotha ekupheleni kuka2024.
Kwiveki ephelileyo, uphinde wayithunuka ingekapholi. Oku kwenzeke ngethuba iGolden Arrows yakhe ibetha iChiefs ngamagowuli amabini kwelinye emdlalweni weBetway Premiership obubanjelwe eMoses Mabhida Stadium. Ibikokwesibini Amakhosi ecanjalaliswa engondlalelwanga ngaBafana Bes'thende.
Ukubethwa kwawo Amakhosi kuwavimbethe ithuba elihle lokusondela kumaqela angasentla kuwo kwiBetway Premiership esondela esiphelweni. Kanti ukuphumelela kweGolden Arrows kuqale ingxoxo ethi uMngqithi, 53, uyibetha lula iChiefs ngoba uyibethe kuwo omabini amaqela awaqeqeshile kule sizini.
Kodwa uyikhabile loo ngcingane ngelithi mninzi umsebenzi owenziweyo ngethuba kulungiselelwa umdlalo. "Andingeke ndithi kulula kanjalo," utshilo uMgqithi emva kokuzuza impumelelo. Ngoku iGolden Arrows ihleli kwindawo yeshumi emva kokuqokelela amashumi amabini anesixhenxe amanqaku emidlalweni engamashumi amabini kule sizini.
Ukuze iqiniseke ngokuphepha izembe, kufuneka iqokelele kwakhona ngoba unzima umlo wamaqela asemsileni. "Ngamanye amaxesha kukuneka sifunde indlela abazenza ngayo izinto abanye abaqeqeshi emaqeleni wabo. Kubalulekile ukwazi into ebasebenzelayo nengabasebenzeliyo.
"Nokuba unganolwazi olungakanani ngeqela oza kudlala nalo, into ebalulekile kukuzilungiselela emzimbeni, ngokwasengqondweni nokucwangcisa kakuhle indlela oza kulwa ngayo. Ukufakwa kwegowuli kuthi kubhence ukungazinzi emdlalweni wethu phaya emva.
USazi Gumbi udlale kakuhle enxele esebenzisana nabadlali abafana noNqobeko Dlamini noVelemseni Ndwandwe. Siye sanzinyelwa xa uGaston Sirino ebedlala ibhola efakwe nguYusurf Maart. Andingethi kulula ngoba kufuneka ulifunde iqela odlala nalo," utshilo uMngqithi. IGolden Arrows iza kudibana neChippa United emalanga ngoMgqibelo, eMpumalanga Stadium.
Related Topics: