IChippa United idlale umdlalo wayo wokugqibela eBuffalo City Stadium, eMonti, emva kokubetha AmaZulu emdlalweni weBetway Premiership ngamagowuli amabini kwelinye ngempelaveki egqithileyo.
Image: Yanga Nothanga/Maya Images
Emva komdlalo wokugqibela eMonti kule sizini, uThabo September ubaqhwabele izandla abadlali bakhe abavelise iziphumo ezihle. Umqeqeshi uvakalise indlela aziva ngayo emva kokuba iChippa United iwise AmaZulu ngamagowuli amabini kwelinye emdlalweni weBetway Premiership obubanjelwe eBuffalo City Stadium emalanga ngoMgqibelo odlulileyo.
Amagowuli weChippa United afakwe nguEnock Sakala ofikayo noCraig Martin kwisigaba sokuqala somdlalo. UTshepang Moreni unike AmaZulu igowuli lokubika ekhaya. Nakubeni AmaZulu egoduke engaphethanga nto esandleni - kodwa ngawo adlale umdlalo obhotele eMonti. Kwisigaba sokuqala, iindwendwe ziyicinezele iChippa United edlale bhetele ixeshana.
Sona isigaba sesibini silawulwe ngaMaZulu sonke. Abadlali beChippa badlalele ukukhusela amagowuli wabo lo nto yavimba abantu umdlalo ovulelekileyo. Kodwa ke into ebalulekileyo kwiChippa United kukubethelela indawo yayo kwiBetway Premiership njengokuba kusondela ixesha lokuvala isizini. Emva komdlalo, uSeptember uvumile ukuba iqela lakhe alidlalanga kakuhle - kodwa walincoma ngoba liwenzile umsebenzi obufuneka.
"Asidlalanga kakuhle emdlalweni wanamhlanje ngenxa yeenguqu eziliqela esizenzileyo eqeleni lethu. Kwisigaba sesibini siye sanyanzeleka ukuba sikhusele esinako ngenxa yokungahlangani komdlalo wethu. Kuhle ngoba siphumelele. AmaZulu ngawo adlale kakuhle emdlalweni wanamhlanje," utshilo umqeqeshi emva komdlalo ogcine iqela lakhe lihleli kwindawo yesthoba.
Noxa iChippa United isahleli kwindawo yethoba - kodwa ayikudanga kwiTop-8 esebenzela yona emidlalweni eshiyekileyo. USeptember umncomile uSakala ofake igowuli lakhe lokuqala noDarren Johnson odlale kakuhle kakhulu ezipalini zakhe.
"Bobabini abadlali badlale kakuhle kakhulu. USakala usazama ukuzinza ngoba usemtsha. Uzimisele kakhulu ejimini futhi unamandla. UDarren ungunozinti ozimiseleyo. Akaqali ukusinceda. Xa enikwe ithuba udlala kakuhle oko," utshilo uSeptember.
Related Topics: