IMagesi FC yamkele amanqaku amathathu emva kokuba ibethe iStellenbosch FC emdlalweni weBetway Premiership odlulileyo.
Image: Facebook
Umqeqeshi weMagesi FC, u-Owen Da Gama, uzamkele ngochulumanco iziphumo ezihle ezifunyenwe liqela lakhe. Oku kulandela ukuphumelela kweMagesi FC ebethe iStellenbosch FC ngegowuli elinye eqandeni yazuza amanqaku apheleleyo emdlalweni weBetway Premiership obubanjelwe e'Old Peter Mokaba Stadium amalanga ngeCawe edlulileyo.
Nangona iqela likaDa Gama lingekaphumi ehlathini - kodwa kukho ithemba elikhulu emva kokuba liphumelele imidlalo emithathu ilandelelana. Ukubetha iStellenbosch yinto enkulu kwiqela elichithe isiqingatha sesizini ekugqibeleni kwiBetway Premiership futhi kungekho themba. Ngoku iMagesi FC ihleli kwindawo yeshumi elinanye.
Emva kwayo kukho amaqela afana neRichards Bay ebethwe yiPolokwane City ngo'3-1 neSuperSport United ebambene ngeqanda neCape Town City emdlalweni obuseLucas Moripe Stadium. Njengokuba kusongwa isizini, onke amaqela asemsileni alwela ukuphepha izembe amanye afuna ukungena kwiTop-8.
Nakubeni iqela lakhe liqhuba kakuhle - kodwa uDa Gama akafuni ukuzisekela enqatheni ngoba indlela isende. "Okwangoku asicingi ngeTop-8 xa ndithetha inyaniso," utshilo uDa Gama obechwayitile emva komsebenzi omhle owenziwe ngabadlali bakhe.
Emva kokuphumelela iCarling Knockout Cup, ukugcina indawo yayo iMagesi kwiBetway iza kuba yinto enkulu ekupheleni kwale sizini. Ukuze iMagesi isinde ngokupheleleyo ezembeni, kunyanzelekile ilwele ukuphumelela eminye imidlalo yayo.
"Sifuna ukubhekela emsileni. Iqela elisekugqibeleni lingaphumelela imidlalo emibini lisityhalele emva. Eyona nto ebalulekileyo kuthi ngoku kukunyukela phezulu. Sisenemidlalo emikhulu esiseza kuyidlala. Siza kuya kwiSundowns nakwiPirates.
"Ngaphezulu koko, siza kudlala nawo onke amaqela aphezulu kwiBetway Premiership. Into endicinga ukuba isilungele kukuqubisana nomdlalo ubemnye ngexesha. Kufuneka silwele ubomi bethu," utshilo uDa Gama emva komdlalo obungempelaveki.
Related Topics: