UJustice echitha ibhola ngentloko emdlalweni weBetway Premiership obuphakathi kweChippa United naMaZulu namhlanje eBuffalo City Stadium, eMonti.
Image: Yanga Nothanga/Maya Images
Agoduka esophisa AmaZulu aguqiswe phantsi yiChippa United ngamagowuli amabini kwelinye emdlalweni weBetway Premiership obutaka iintlantsi eBuffalo City Stadium namhlanje emalanga. Ukuphumelele kwayo iChippa kuyigcine kwindawo yethoba. Azamile AmaZulu - kodwa uDarren Johnson uye wangumqobo ezipalini zakhe emdlalweni wanamhlanje.
Isiqingatha sokuqala siqale ngesantya esiphantsi. Omabini amaqela khange angxame ngoba ebengafuni ukwenza iimpazamo umdlalo usaqala. Emva kwemizuzu embalwa umdlalo uqalile, AmaZulu awuthathele kuwo umdlalo. Ngawo ahlaseleyo nangona engakwazanga ukudala amathuba acacileyo.
UBen Motshwari no-Ethan Brooks bayibambe yaqina emva bemane betyala iibhola eziya emacaleni kuTshepang Moreni oyingozi nakuHuman Rowan. Kanti uElmo Kambindu, obesebenzisana noHendrick Ekstein, ebegadwe kakhulu nguThabo Makhele noJustice Chabalala.
Phakathi kwisigaba sokuqala, iChippa United iphaakamise umdlalo wayo. UVeli Mothwa uchithe ibhola embi yokuqala yeChippa United emzuzwini weshumi elinesihlanu. Emva koko uEnock Sakala uvalelele emnatheni ibhola ebigotywe ngobuchule nguGiovanni Philander emzuzwini wamashumi amathathu.
Emzuzwini wamashumi amane, uGraig Martin ufake igowuli lesibini leChippa United kwahlokoma iBuffalo City Stadium ebegcwele abalandeli bebhola ekhatywayo eMonti. Phambi kokusongwa kwesiqingatha sokuqala, uDarren Johnson uvale iibhola ezimbini - kodwa woyiswa kukuvala efakwe nguMoremi.
AmaZulu adlale odwa kwisigaba sesibini. Ahlasele macala onke efuna igowuli lokulinganisa. UJohnson wence umsebenzi oncomekayo kakhulu ezipalini endaweni kaStanley Nwabali obengekho emdlalweni wanamhlanje ngenxa yokufika emva kwexesha kuhambo olusa eNigeria.
Related Topics: