IXaba Promotions ivala inyanga ngengxikela yetumente yamanqindi eMonti

Kuzaw' shiyana oomama ukondla kwitumente yamanqindi ngempelaveki eMonti xa kudibana oomakadezondana. Inkampani yabathelekisi, iXaba Boxing Promotions, ithembisa abantu ngokuvala inyanga yamalungelo oluNtu ngengxikela yetumente yamanqindi eza kube ibanjelwe e'Oreant Theatre ngentsmbi yesixhenxe ngorhatya loMgqibelo wokugqibela kule nyanga.

Umlo ophambili uza kube uphakathi kukaSiyabulela 'Showtime' Hem naye uEnoch Tetteh waseGhana oyingozi. La madodana mabini aza kulwela intshinga yeJunior featherweight emlweni ekulindeleke ukuba kukhale indoda engazilungiselelanga kuwo. UHem (21) noTetteh (23) ziimbethimanqindini ezinekamva eliqaqambileyo ngoba ziyakwazi ukulwa ngendlela ancomekayo.

Iza kucaca inkunzi phakathi kwazo ngempelaveki. Uyaziwa uHem ngoba sele ezenzele igama ngokuphumelela intshinga yeSA junior featherweight. Njengomntu ozalelwe eDuncan Village enembali yokulwela inkululeko, uHem unoxanduva lokuyiphakamisela phezulu emlweni ongempelaveki.

UHem eya emlweni olandelayo ekhuthazekile emva kokubetha uBongani Mahlangu kumjikelo wesithathu ekupheleni konyaka ka2024. Iliqela imidlalo eza kutshayelela umlo ophakambili ngoMgqibelo.

Omnye oza kutsala umdla wabalandeli bamanqindi ngoka-Abongile Jacobs oza kulwa noSiseko Teyisi emlweni onemijikelo elishumi elinambini. Bona balwela intshinga yeSA junior flyweight. Yena uNhlanhla Tyirha uza kuvana amandla noPhumlani Maloni komnye umlo ekulindeleke ube shushu kakhulu.

Akuphelelanga apho ngoba kukho imilo yeembethimanqindi ezinetalente eziquka uSihle Jelwana oza kuxikixana noMoyisi Booi kube nzima eMonti. Naye uMzamo Makibeni uza kulwela ukugoduka ezuze impumelelo emlweni adibana kuwo noGcobani Mdeliswa ofuna iziphumo ezihle.

Yena uSinovuyo Mtintelwa uza kusebenzela ukumbeka ecaleni kwangoko uMasivuye Philiso. Kanti komnye umdlalo kudibana uLikho Sigaba no-Indiphile Bottoman. Kungenwa ngeR150 emnyango - kodwa abafuna ukusondela eqongeni baza kubhatala iR400.