Ezemidlalo

iTS Galaxy igxeshe ukubhukuqa iStellies ingene kwiCAF Confed Cup

Pedro Mapelo|Published

UVuyo Mere no'Adnam Beganovic ngabaqeqeshi beTS Galaxy eqale kakubi isizini - kodwa ngoku elwela indawo yesithathu kwiBetway Premiership.

Image: TS Galaxy/Facebook

Nakubeni indawo yokuqala neyesibini sezicaca kwiBetway Premiership, umlo ngendawo yesithathu unzima. Iqela laseMpumalanga, iTS Galaxy, lithi liza kulwela ukubamba indawo yesithathu xa kuphela isizini ukuze likwazi ukufumana indawo kwiCAF Confederation Cup edlalwa ngamaqela aqhube kakuhle.

Oku kuvezwe ngumqeqeshi, uAdnam Beganovic, emva kokuba iTS Galaxy yenze umsebenzi oncomekayo eThekwini - apho ibethe khona AmaZulu ngamagowuli amabini kwelinye emdlalweni odlulileyo. Ukuzithemba kukaBeganovic akothusi konke konke ngoba iTS Galaxy ithe ngcu kwindawo yesine, ilingana ncamashi ngamanqaku neStellenbosch FC ebambe indawo yesithathu kwiBetway Premiership.

Wafika isokola iTS Galaxy emva kwesiqalo esibi phantsi kwesandla sikaSead Ramovic owalahlayo. Ukuqhuba kakuhle kweqela likaTim Sukazi yenze yezinto ezingabalulwa kule sizini, ngakumbi emva kokuba imkelwe ngumqeqeshi nabadlali abe beziintsika abathengiselwe amanye amaqela.

UBeganovic uthi indawo yesithathu ingayinto enkulu kwiTS Galaxy. "Ukuba singafumana indawo yesithathu okanye eyesine, sifumane indawo kwiCAF Confederation Cup kwisizini ezayo, ingayinto enkulu embalini yeqela.

"Sindithethile ngale nto noSihlalo weqela, uMnu. Tim Sukazi. Ibikade iliphupha - kodwa ngoku yinto esifaneleyo ukudlala kwiConfederation Cup," utshilo umqeqeshi kutshanje. Yakhe yadlala iTS Galaxy kwiCAF Confed kwiminyaka engaphambili emva kokuphumelela iNedbank Cup.

"Siza kulwela ukuphumelela umdlalo ngamnye esiwudlalayo. Ukusukela oko ndathatha iintambo kweli qela, umdlalo wethu uphucuke emdlalweni ngamnye esiwudlalileyo. Ngenxa yabadlali bethu abadlala ngokuzithemba, sikwazile ukudala amathuba asinika amagowuli.

"Ukuba siyalifumana ithuba lokubamba indawo yesithathu, sakulibamba ngezandla zozibini," utshilo uBeganonic. Emva kwekhefu leFifa, iTS Galaxy iza kudibana neMarumo Gallants emdlalweni osemalanga ngeCawe.