Arthur Zwane ngumqeqeshi oyintloko waMaZulu onethemba lokuba aza kuqokelela amanqaku oneleyo okungena kwiTop-8 xa kusongwa isizini.
Image: AmaZulu/Facebook
Njengokuba isizini yePremier Soccer League isongwa, onke amaqela alwela ukufumana iindawo ezihloniphekileyo. Phakathi kwamaqela alwela ukungena kwiTop-8 kukho AmaZulu neChippa United. La maqela mabini aza kuqibisana emdlalweni weBetway Premiership ekulindeleke utake iintlantsi emalanga ngoMgqibelo.
UThabo September uxelele oonondaba kutshanje ukuba iChippa United iza kulwela ukuyiphumelela imidlalo eshiyekileyo ukuze ifumane indawo kwiTop-8 xa kuvalwa isizini. Kanti naye uArthur Zwane ufuna AmaZulu alwele iTop-8 emva kokubethwa emidlalweni emibini ilandelelana phambi kwekhefu leFifa kwiveki ephelileyo.
AmaZulu, ayiqale kakubi isizini - kodwa azamile ukuqokelela amanqaku phantsi kukaZwane obekade ebambisene noVusumuzi Vilakazi ohambileyo kwinyanga ephelileyo. Naye ufuna AmaZulu angene kwiTop-8 ukuze akwazi ukudlala kwiMTN8 enika amaqela aqhube kakuhle ithuba lokuphumelela indebe ekhatshwa zizigidi ezisibhozo zerandi (R8-million) ekuqaleni kwesizini entsha.
"Sishiyeke nemidlalo esixhenxe ekunyanzelekileyo ukuba senze umsebenzi obhetele kuyo. Likhona ithuba lokubethelela indawo yethu kwiTop-8 kodwa noxa siphulukana nemidlalo ngendlela engathandekiyo. Ngendisiva ukuba bekusenzeka lo nto sidlalela kude nekhaya.
"Andithi masiyikhethe imidlalo - kodwa kufanele ukuba sidlalela ukuphumelela ngoku," utshilo uZwane emva kokuba AmaZulu ewiswe yiTS Galaxy. Umqeqeshi uyibeke yacaca into ayifunayo ebadlalini bakhe kwimidlalweni eshiyekileyo.
"Inye into esifuna ukuyenza, kukufumana amanqaku apheleleyo. Abadlali bayayazi bonke lo nto. Sifuna ukuvala isizini sikwindawo ehloniphekileyo. Siza kuzama ukulwa ngamandla emidlalweni eshiyekileyo.
"Kunyanzelekile ukuba sidlalele ukuphumelela umdlalo ngamnye esiwudlalayo. Ikhefu liza kusinika ithuba lokulungisa izinto. Kufuneka siyilungise ngoba asikwazi ukulahla imidlalo ngale ndlela," utshilo uZwane owamkela uWendell Robinson ongumqeqeshi omtsha woonozinti.
Related Topics: