UThabo September, ongumqeqeshi weChippa United, ebukele umdlalo weBetway Premiership kutshanje
Image: Yanga Nothanga/Maya Images
Emva kokuba iChippa United ifumene iziphumo ezincumisayo, uThabo September uthe unethemba lokuba iqela lakhe liza kufumana indawo kumaqela asibhozo aphambili kwiBetway Premiership xa kusongwa isizini. Ukuthethe oku emva kokuba iChippa icambalalise iPolokwane City ngamagowuli amabini eqandeni emdlalweni obubanjelwe eBuffalo City Stadium, eMonti, kubusuku boMgqibelo odlulileyo.
Impumelelo ilithathe iqela laseMpuma Koloni yalibeka kwindawo yethoba kwiBetway Premiership. Amagowuli ephumelele ngawo iChippa United afakwe nguAzola Ntsabo noBrian Bwire ogwaze umkhonto ekhaya sekuphela ixesha kwisigaba sesibini somdlalo eMonti.
Ngoku iqela likaSeptember lifumene ithuba lokuphefumla kancinci kwindawo yethoba emva kokuqokelela amashumi amabini anesihlanu amanqaku emidlalweni engamashumi amabini yeBetway Premiership. USeptember uzamkele ngovuyo iziphumo ezihle ezifunyenwe liqela lakhe emdlalweni obunabo ubunzima.
"Ukufumana kwethu amanqaku amathathu yinto enkulu kuthi. Le yimpumelelo esisondeza kwiTop-8 futhi isibhekelisa kancinci kumaqela aqhuba kakuhle emva kwethu," utshilo umqeqeshi weChippa United ebike yagqwidiza emidlalweni ephambi kwalo ugqithileyo.
Ngoku iChippa United ijonge ukuphinda ifumane amanqaku apheleleyo xa isamkela AmaZulu ayingozi emdlalweni weBetway Premiership oza kube ungomhla wamashumi amabini anethoba kule nyanga eBuffalo City Stadium. "Ngamanqaku amane kuphela esiwadingayo singene kwiTop-8. Ukuphumelela kwethu kusinika ithemba lokuba siza kuqhuba kakuhle emidlalweni eshiyekileyo ngoku.
"Kubalulekile ukuqhuba kakuhle kwethu. Amathuba avelayo emidlalweni afuna ukusetyenziswa kakuhle. Indlela esidlala ngayo kwiindawo esingasinika amagowuli ifuna ukulolwa. Ziseliqela iindawo ezifuna ukulungiswa emdlalweni wethu ukuze sibe liqela elidlala kakuhle. Ndinethemba lokuba sakudibana naMaZulu siwulungele umdlalo," utshilo uSeptember.
Related Topics: