Amakhosi anxubile emva kokubethwa yiRichards Bay emdlalweni weBetway Premiership obubanjelwe eKing Zwelithini Stadium ngeCawe egqithileyo.
Image: KC/WhatsApp
Kukho ukudana okwambethe abalandeli beKaizer Chiefs elizweni lonke. Unobangela wodano kukungaqhubi kakuhle kweChiefs kule sizini eqhubekayo phantsi komqeqeshi owayefunwe ngabalandeli emva kokugxogxa ngamatye uMolefi Ntseki kunyaka ophelileyo.
Ekufikeni kwakhe uNasreddine Nabi, kwabakho ithemba ngoba zazikhona iintlantsi ezintaluzayo - kodwa ziphelele emoyeni ngoba iChiefs isedikidiki njengakwisizini edlulileyo. Namhlanje iphumelela kakuhle, ngomso ibethwe emdlalweni olula. Kubonakala ngathi uphelelwe ngamaqhinga uNabi ngoba iChiefs ayide ibuyele kundalashe.
Oku kucace gca emva kokuba iChiefs ibethwe yiRichards Bay esokolayo ngamagowuli amabini eqandeni emdlalweni weBetway Premiership obuseKing Zwelithini Stadium ngempelaveki egqithileyo. Amakhosi aphose elinye ithuba lokunyukela phezulu kwiBetway Premiership.
Indlela ekunzima ngayo, kungenzeka ingangeni kwakhona kwiTop 8 ephuncuke ezandleni kwisizini egqithileyo phantsi kukaCavin Johnson owangena endaweni kaNtseki. Emidlalweni engamashumi amabini anesibini, Amakhosi abethwe kwelithoba. UNabi, obephoxekile emva komdlalo, uxelele iintatheli ukuba kuza kuthatha ixesa elide ukuvusa iChiefs.
Nangona uninzi lwabantu belinethemba leziqhamo ezihle xa kuleli xesha, umqeqeshi uthe inkqubo yokwakha iqela ngokutsha isaqhubela phambili. "Enyanisweni sisalakha iqela. Kuthatha ixesha elide ukwakha iqela elikhulu njengeChiefs," utshilo uNabi emva kokuphoxwa liqela lakhe KwaZulu-Natal.
Eyona ngxaki ephambili kwiChciefs kukungakwazi ukufaka ibhola emnatheni ngoba kwicala lokudala amathuba ihamba phambili. URanga Chivaviro obeqale kakuhle isizini ufile. Naye uTashreeq Morris ofikayo akakayincedi iChiefs ngendlela ekufuneka ngayo.
"Siyayazi into efunekayo nendawo efuneka kuyo ukuze sibeneqela elibhetele. Emdlalweni wanamhlanje bekufanele ukuba sifumene amagowuli nangona besidlala neqela ebelihleli emva," utshilo uNabi. Amakhosi aza kuphumla ngenxa yemidlalo yeFifa.
Related Topics: