Ifolosi yeMamelodi Sundowns , u-Iqraam Rayners noMbekezeli Mbokazi we'Orlando Pirates, emdlalweni weBetway Premiership obuseFNB Stadium izolo emalanga.
Image: Yanga Nothanga/Maya Images
Emva kokugqwidiza kweMamelodi Sundowns emdlalweni obalulekileyo, umqeqeshi uvumile ukuba iqela lakhe liqale kakubi emdlalweni. UMiguel Cardoso uvakalise ukuphoxeka kwakhe emva kokuba iSundowns iquthiswe yi'Orlando Pirates ngamagowuli amabini kwelinye emdlaleni weBetway Premiership obuseFNB Stadium emalanga ngoMgqibelo odlulileyo.
Amagowuli afakwe nguRelebohile Mofokeng kwangoko kwisigaba sokuqala somdlalo ayophule amalungu iSundowns ayadlala ngendlela yayo yesiqhelo. Nakubeni iphulukene nawo umdlalo wayizolo - kodwa iSundowns isahamba phambili ngeshumi elinesihlanu lamanqaku kwiPirates ehleli kwindawo yesibini.
Umqeqeshi uthe yindlela eqale ngayo iSundowns ebangele ukuba ibethwe emdlalweni wayozolo phambi kwenyambalala yabalandeli bebhola ekhatywayo abaqabele kumashumi amahlanu amawaka. "Xa uqala umdlalo ngendlela esiqalengayo, akukho nto entle ongayilindela ekupheleni," utshilo uCardoso.
"Into endingayincoma kukuba sizamile ukubuyela emdlalweni kwade kwangumzuzu wamashumi amabini anesihlanu kwisigaba sokuqala. Sona isiqingatha sesibini sisidlale ngeentliziyo, hayi ngengqondo. Ibhola ekhatywayo ifuna usebenzise ingqondo kakhulu. Bekukho ixesha apho usompempe angakuvumelanga ukuhamba kakuhle komdlalo.
"Abantu bebeziwisa ebaleni, ihlazo elibi. Ukuba yindlela ebicwangcise ngayo iPirates, inene iyisebenzele. Thina sichanwe sisiqalo sethu esibi," utshilo umqeqeshi weSundowns. Uthe iqela lakhe kufuneka lizimisele kakhulu emidlalweni elandelayo yeBetway Premiership. "Emdlalweni weBetway olandelayo, kufuneka sidlale ngathi sidlalela ukuphumelela indebe. Kufuneka sifele ebaleni ngoba akukho ndlela engenye esingayenza ngayo le nto.
"Ndiqinisekile iPirates neSundowns ziseza kubethwa emidlalweni eshiyekileyo - kodwa ndiyathemba ukuba siza kuqinisekisa asibethwa emidlalweni emininzi. Ukuba singaphumelela imidlalo emine, singayifumana into esiyifunayo. Indebe yona iza kulwelwa kude kube sekugqibeleni, kucacile," utshilo uCardoso.
Related Topics: