Amakhosi abethe iStellenbosch FC emdlalweni weNedbank Cup obuseNelson Mandela Bay Stadium namhlanje.
Image: Yanga Nothanga/Maya Images
Bagoduke bonwabile abalandeli beKaizer Chiefs emva kokuphumelela umdlalo obunzima eGqeberha. Amakhosi acambalalise iStellenbosch FC ngamagowuli amathathu kwelinye emdlalweni weNedbank Cup obutaka iintlantsi eNelson Mandela Bay Stadium namhlanje ngorhatya.
Ukuphumelela kwawo kulenza iqela lesibini elizibekele indawo kumjikelo olandelayo emva kwePirates ezibethele iSuperSport United kwiipenela emdlalweni obubanjelwe ePolokwane emalanga namhlanje. Njengesoqhelo xa kudibene la maqela mabini, umdlalo wanamhlanje uvelise ngqo into ebifunwa ngabalandeli.
Iimpazamo ezenziwe ngabadlali beStellenbosch zibenzele iingxaki. Amakhosi akhokele ngegowuli emzuzwini wamashumi amabini emva kwepenela efakwe ngu-Inacio Miguel. Ngumdlali wasemva weStellies obambe ibhola isiya entloko kuGodly Lilepo.
Banyuse umxakatho abadlali beqela laseNtshona Koloni befuna igowuli lokulinganisa ebhodini phambi kokutshintshwa kwamacala eNelson Mandela Bay Stadium ebigcwele abalandeli beChiefs abanxanelwe indebe emva kwendlala yeminyaka elishumi.
Indlela iStellenbosch edlale ngayo isigaba sesibini ibonise mhlophe ukuba ifuna igowuli. Amakhosi akadlalanga ngendlela adlale ngayo kwisigaba sokuqala somdlalo. Yenze into eyithandayo iStellenbosch - kodwa ngelishwa layo, uBruce Bvuma khange avume.
USteve Barker ufake uAndre de Jong ontantazelise abadlali beChiefs emva. Kuthe xa kushiyele imizuzwana kuphele ixesha lomdlalo, uDe Jong ufake igowuli ngentloko atsho abambana amaqela. Kongezwe ixesha uPule Mmodi wafaka igowuli elilandelwe lelikaMfundo Vilakazi emva kwempazamo eyenziwe ngumdlali weStellies engekho unozinti ezipalini.
Related Topics: