UAshley Du Preez ifake igowuli leKaizer Chiefs ebethe iMagesi FC emdlalweni weBetway Premiership obuseFNB Stadium.
Image: KC/Facebook
UNasreddine Nabi uwamkele amanqaku amathathu afunyenwe liqela lakhe nangona umdlalo walo ubungekho kwizinga ebelilindelekile. Amakhosi abethe iMagesi FC ngegowuli elinye eqandeni emdlalweni weBetway Premiership obubanjelwe eFNB Stadium kubusuku bangoLwesibini kule veki. Igowuli elinike Amakhosi amanqaku amathathu lifakwe nguAshley Du Preez kwisigaba sesibini somdlalo emva kokunikelwa ibhola entle nguGlody Lilepo ofumene iwonga lomdlali oqaqambileyo.
Ngenxa yokunqunyanyiswa kwabadlali abaninzi nabonzakeleyo, uye wanyanzeleka uNabi ukuba enze iinguqu eziliqela. Akukho nto engako enokubaliswa ngoBruce Bvuma ngoba khange afumane bunzima ezipalini. Iifolosi zeMagesi FC eziquka uGift Motupa, uTshepo Kakora noMncedisi Vandala ziphume kungekho nto eziyifumeneyo ngoba khange kubekho mathuba maninzi acacileyo emdlalweni. Uvumile naye uOwen Da Gama emva komdlalo ukuba iqela lakhe alidlalanga kakuhle.
Amanqaku amathathu aphulule iintliziyo zabalandeli beKaizer Chiefs ezithunukwe yiMamelodi Sundowns ephumelele ngegowuli elinye eqandeni emdlalweni obubambene eLucas Moripe Stadium ngempelaveki egqithileyo. Ngoku iChiefs isahleli kwindawo yesibhozo ngamanqaku angamashumi amabini anesibhozo emidlalweni engamashumi amabini kwiBetway Premiership. Ukuba iChiefs ibidlala ngendlela eyayiqale ngayo isizini, ngeyiphakathi kwamaqela aphezulu ngoku.
UNabi uvumile ukuba iMagesi iwe nzima emdlalweni. "Size emdlalweni wanamhlanje sisazi ukuba uza kuba nzima. IMagesi iyawasokolisa amaqela amakhulu. Sonke sayibona into eyayenza kwiCarling Knockout Cup idlala nePirates neSundowns," utshilo uNabi kwiDStv TV emva komdlalo. "Kubekhona ukusokola nakwelethu icala ngenxa yeenguqu esizenzileyo phambi komdlalo. Emidlalweni enje, into ebalulekileyo kukuthatha amanqaku uhambe," utshilo umqeqeshi weChiefs eza kudibana neStellenbosch emdlalweni weNedbank Cup ngempelaveki.
Related Topics: