Akonelisekanga ncam umqeqeshi ngumsebenzi weSundowns

Nangona iMamelodi Sundowns ikwazile ukuphumelela umdlalo izolo, umqeqeshi wayo akonelisekanga ngokupheleleyo. UMiguel Cardoso uvakalise izimvo zakhe emva kokuba iSundowns ibethe iMpheni Home Defenders ngamagowuli amabini eqandeni emdlalweni weNedbank Cup obubanjelwe eLucas Moripe Stadium emalanga izolo. Amasandawana adlulele phambi ngokufanayo namaqela aquka iKaizer Chiefs, Orlando Pirates, iSuperSport United, iMarumo Gallants namanye.

Amagowuli ephumelele ngawo iMamelodi Sundowns afakwe nguTashreeq Matthews noBathusi Aubaas kwisigaba sokuqala. Ngelishwa iSundowns isidlale phantse sonke isiqingatha sesibini somdlalo iqhwalela emva kokukhutshwa kukaMatthews ngekhadi elibomvu. Iqela laseLimpopo elidlala kwiABC Motsepe League lizamile ukuxhathisa kwisigaba sesibini somdlalo noxa bekunzima ukufumana igowuli. Ebekhona amathuba ambalwa emdlalweni - kodwa kude kwaphela umdlalo iSundowns ibambelele kumagowuli wayo.

UMiguel Cardoso uzamkele iziphumo eziveliswe yiSundowns emdlalweni weNedbank Cup - kodwa ekhala ngamathuba angasetyenziswanga kakuhle. Abantu abaninzi bebelindele ukuba iSundowns iphumelele ngemvula yamagowuli njengokuba iqhele ukwenza. "Emva kokufumana amagowuli amabini, besilindele ukuba umdlalo siza kuwusonga sinamagowuli abhetele ebhodini," utshilo uCardoso emva komdlalo kwiSuperSport TV. IMpheni ikulwele ukungabethwa kakhulu emdlalweni wayizolo.

"Ndibaxelele abadlali ngexesha lokuphumla ukuba bekufanele sifake amagowuli amaninzi kwisigaba sokuqala somdlalo. Kwisigaba sesibini, Tashreeq ukhutshwe kwangoko ebaleni kwanyanzeleka ukuba sizame ukuvala amazibuko. Ndizamile ukubanqanda abadlali abebefuna ukungena ngoba akukho nto engako ebesiyidinga emdlalweni ngaphezulu kwamagowuli amabini. Andikwazi ukuthi ndiyavuya ngoba bekufanele ukuba sinamagowuli amaninzi nakubeni umsebenzi siwenzile," utshilo umqeqeshi.