UMofokeng ufumene imoto ngenxa yokugqwesa kwakhe ebholeni
Umdlali weOrlando Pirates uRelebohile Mofokeng unikwe imoto entsha kraca liSebe lezeMidlalo, ubuGcisa, iNkcubeko noLonwabo laseGauteng kulandela imbasa awayifumana kwiimbasa zeSebe ngo2024 ngokugqwesa kwibhola ekhatywayo.
Lo mdlali wePirates oneminyaka engamashumi amabini (20), nodlalela iqela lesizwe lebhola ekhatywayo, aBafana Bafana, uphumelele imbasa yokuba ngoyena mntu ubalaseleyo kwezemidlalo wonyaka ka2024–iSports Personality of the Year–kwiimbasa zemidlalo iGauteng Sport Awards ngenyanga yeNkanga ka2024.
UMofokeng unikwe le moto nguMphathiswa wezeMidlalo, ubuGcisa, iNkcubeko noLonwabo eGauteng, uMatome Chiloane ekunye noPhilani Xaba noSipho Mngomezulu abaphuma kwiJoma Sport ebonelele ngale moto. Olu nikezelo lwenzeke eBidvest McCarthy VW Westgate eRoodepoort izolo, ngoLwesithathu.
“Eyona nto ibibalasele ngolu suku [ngoLwesithathu] ibikuwonga uRelebohile Mofokeng, umntu wethu obalaseleyo kwezemidlalo ngonyaka ka2024 ngemoto entsha kraca, nto leyo engqina ukuzinikela nokugqwesa kwakhe.
“Ngobudlelwane obuluqilima nombono ocacileyo, iGauteng ikulungele ukuqhubeka ivelisa iintshatsheli ngaphakathi nangaphandle kwebala,” utshilo uChiloane.
UMofokeng uzibonakalisile ukuba ungumdlali okumgangatho ophezulu, kwaye kuninzi akuzuzileyo esemncinane. Imbasa ayifumene kwiSebe yongeza kwezinye iimbasa azifumeneyo, eziquka iDStv Premiership Young Player of the Season kunye neNedbank Cup Most Promising Player of the Tournament.