UJose Riveiro akawuvali umlomo ngoRelebohile Mofokeng oxakileyo!

Umqeqeshi we'Orlando Pirates, uJose Riveiro, akawuvali umlomo ngoRelebohile Mofokeng emva kokuba enze ezibukwayo kwakhona. Oku kulandela umsebenzi omhle owenziwe nguMofokeng oncede iPirates yabetha iTS Galaxy ngamagowuli amabini eqandeni emdlalweni weBetway Premiership obuseMbombela Stadium ebusuku ngoLwesibini wale veki.

Igowuli lokuqala lifakwe nguThalente Mbata kwisigaba sesibini emva kokufumana ibhola ebiqale yadlalwa kakuhle nguMofokeng oxakileyo kwiBetway Premiership. Kwisigaba sesibini, uMofokeng ubethelele isikhonkwane kwibhokisi ekungcwatywe ngayo iTS Galaxy ngegowuli elihle alifake ekude kwisigaba sesibini.

Impumelelo ithathe iPirates yayibeka phezulu kwiBetway Premiership ephikisana kuyo neMamelodi Sundowns ekwindawo yesibini emva kokubetha iCape Town City ngamagowuli amathathu eqandeni izolo. Ukuqhuba kakuhle kubhence ukutyeba kwayo iPirates enabadlali abaninzi abonzakeleyo abaquka uTapelo Xoki no'Olisa Ndah.

"Wenza indima yakhe njengabanye abadlali eqeleni. Sinabadlali abanetalente futhi abasemgangathweni ophezulu. Kuhle ukubona abadlali bedlala umdlalo odibeneyo njengakulo mdlalo esiphuma kuwo," utshilo uRiveiro emva komdlalo eMbombela Stadium ekuqaleni kwale veki.

"Yinto entle kum ukuba nabadlali abanje eqeleni. Kukho abadlali abangadlalanga ngenxa yokonzakala - kodwa abakhoyo bawenze kakuhle umsebenzi. UMohau Nkota noThabiso Sesane bazibonakalisile ukuba bafuna ukudlala kwiPirates kule sizini.

"Bayasibonisa ukuba bazibophelele kokufunwa liqela kule sizini. Size apha sizixelele ukuba sifuna amanqaku amathathu emva koko sibuyele eGoli. Inde indlela esiza kuyihamba - kodwa izinto zihamba kakuhle okwangoku. Size emdlalweni sisazi ubunzima obulindelekileyo.

“Abadlali bethu basoloke bedlala ngesantya esiphezulu emidlalweni yonke. Kufuneka siqhubele phambili nokwenza umsebenzi omhle. Into encomekayo kukuba akufakwanga gowuli kuthi nangona iTS Galaxy ibikhe yasongamela," utshilo uRiveiro emva komdlalo odlulileyo.