Iimbaleki ziqhumiselene ngothuli kwiMbekeni 5km Fun Run ebiseKomani!

Zigoduke zincumile iimbaleki eziphumeleleyo kugqatso obeluseKomani ngempelaveki. Baqikelelwa ngaphaya kwamakhulu amathathu abantwana abangamakhwenkwe nabangamantombazana abathathe inxaxheba kumdyarho weembaleki obuququzelelwe ngumbutho ongekho phantsi kukaRhulumente ekuthiwa yiKotelo Mbekeni Foundation.

Izikolo ezithathe inxaxheba ngentseni yangoMgqibelo odlulileyo zikwindawo ekuthiwa kuseZola, eKomani. Nakubeni ulutsha beluphume ngobuninzi - kodwa bekukho neembaleki ezaziwayo kwiphondo leMpuma Kolo. Njengokuba iimbaleki bezahlulwe ngokwemigangatho yazo, kooxholovane kuphumelele uYanga Malusi oziqhumisele ngothuli iimbaleki ezininzi abekhuphisana nazo.

UMalusi yimbaleki eyaziwayo kwimigama emide kwiphondo leMpuma Koloni. Kwiinyanga zokuqala kulo nyaka, uke wayokubaleka iLondon Marathon okokuqala eYurophu. Indawo yesibini ufunyenwe nguMacakathi Siphelele owenze umsebenzi oncomekayo kakhulu. Yona indawo yesithathu ifunyenwe ngu-Okuhle Nyude. Kanti kumanenekazi, indawo ephambili ifunyenwe nguSomila Ketani obaleke ngendlela encomekayo.

Indawo yesibini ibanjwe yimbaleki eyaziwayo jikelele, uZandile Rubushe. Yena uAchuma Mpama uzifumanele indawo yesithathu kwiMbekeni 5km Fun run. Ngokuququzelela umdyarho weembaleki, iKotelo Mbekeni Foundation ibinika ithuba iimbaleki zangomso ithuba lokuziqaqambisa zifunde nakwezindala.

Wonke lo msebenzi wenziwe kusetyenziswana nezikolo kuba iziindawo zokuqala ezilola izakhono ebomini babantwana. Abaninzi bazithaphulele kwiintarhantarha zamabhaso akhutshwe emva kogqatso. Ishumi elinesibhozo lonke labantwana liphiwe iivawutsha ezixabisa amakhulu amahlanu erandi (R500) ukuze bakwazi ukuzithengela iiteki zokubaleka.

Zona iimbaleki ezindala zifumene imali ephakathi kwamakhulu amabini erandi (R200) ukuya kwiwaka lonke lerandi (R1000). Omnye wabaququzeleli uxelele I'solezwe lesiXhosa ukuba izinto zihambe kakuhle kakhulu futhi ukuphuma kolutsha kubashiye bekhuthazekile.