UBongani Fule ugqwese kwitumente ebibanjelwe eGinsberg Hall
Njengokuba impelaveki egqithileyo ibixakekile ngenxa yemidlalo entlobo ntlobo, naseGinsberg, eQonce, bebexakiswe yitumente yeembethemanqindi ezisakhulayo. Ziimbethimanqindi ezishumi elinesine ezithathe inxaxheba kwitumente ebishushu ngendlela emangalisayo kwiholo loluntu laseGinsberg.
Inkampani yabathelekisi ekuthiwa yiFireworks Boxing Promotions eququzelele ngempumelelo imilo yolutsha oluphume kwiindawo ezahlukeneyo kwiphondo leMpuma Koloni elaziwayo kwicala lamanqindi. Emlweni wentshinga ebingenamntu eMpuma Koloni, kuphumelele uBongani Fule waseMakhanda. UBongani uzuze intshinga yefeatherweight emva kokuba ebethe uAbongile Tokwe wamlahla phantsi kumjikelo wesine womlo obunemijikelo elishumi.
Komnye umlo omkhulu weJnr flyweight, uAkhona Msindeli ohlala eMdantsane uzibethele uLoyiso Ngantweni waseDuncan Village ngamanqaku. Emijikelweni emithandathu yomlo, khange kubekho mbethimanqindi efuna ukunikezela kwade kwasongwa umdlalo. Kwicala lamanenekazi, uSimamkele Genu uzenzele igama ngokuphumelela ngamanqaku. UGenu waseMdantsane woyise uAzola Hekeni waseNcerha.
Yena uNdibulele Ngqamza waseGinsberg usikhusele isidima sendawo yakhe ngokubetha uSinalo Mxokozeli waseNcerha ngamanqaku emlweni weFlyweight obunemijikelo emine. Kulandele omnye umlo otake iintlantsi zisuka. Ophumeleleyo nguSiyamthanda Mbali waseMdantsane obethe uSive Mqhayi waseZwelitsha kumjikelo wokuqala. Kanti yena uBuhle Mhlophe wasePhumlani uphumelele ebunzimeni kuThobela Khuhlane waseGinsberg.
UBuhle uphumelele ngamanqaku emlweni weMini-flyweight obunemijikelo emine. Le yitumente exhaswe lisebe leZemidlalo phantsi kwenkqubo yalo yophuhliso esele ivelise iintshatsheli ezininzi eMzantsi Afrika. Iintshatsheli ezifana noThulani Mbenge ziphuma ngqo kwinkqubo yophuhliso equka imidlalo eyahlukeneyo emininzi phantsi kwesebe leZemidlalo kwiphondo leMpuma Koloni.