Ibuyela eSisa Dukashe Stadium kwakhona imidlalo yeBrutten Top 10
Emva kwekhefu leeveki ezimbini zonke, imidlalo yeBrutten Top 10 ibuyela eMdantsane kwakhona. Amaqela amane ashiyekileyo aza kulwela ukuya emdlalweni wokugqibela xa edibana emidlalweni ejongwe ngamehlo abomvu eSisa Dukashe Stadium ukusukela ngentsimbi yokuqala eminemaqanda ngeCawe.
Kulindeleke ukuba imidlalo itsale umdla omkhulu ebantwini ngoba kushiyeke amaqela adlale umbhoxo osemgangathweni ophezulu ukusukela ekuqaleni kwayo iBrutten Top 10. Emdlalweni wokuqala, iYoung Leopards, engabethwanga nakanye emidlalweni edlulileyo, iza kudibana neFort Hare Blues. Kwelinye icala, iSwallows iza kuxikixana neWSU All Blacks.
Elona qela liyingozi kakhulu yiYoung Leopards ngoba akukho nto elingakwazi ukuyenza. Lihle ekuhlaseleni, ekulaleni emgceni futhi liyakwazi ukuqabeli ibhola. Umdlalo wayo iLeopards uyancomeka futhi xa isebaleni yenza umsebenzi ococekileyo. Kodwa iza kudibana noontanga bayo kwiFort Hare Blues.
Abafundi bakwaNokholeji bazicacisile kwiBrutten Top 10 ukuba bafuna ukwenza imbali kwitumente yombhoxo yokuqala phantsi kweBorder Rugby Union exhaswa nguTekkie Town. Phantsi kukaChase Morison, iFort Hare izimisele ukusebenzisa imidlalo yeBrutten Top 10 ukuze ibuyele emidlalweni yamaziko emfundo aphakamileyo (Varsity Cup).
Oku kucace ngethuba iphucula indlela edlala ngayo emva kokubethwa yiWSU All Blacks emidlalweni yokuqala kwiBrutten Top 10. Kumaqela ashiyekileyo, iSwallows lelona qela elinamava - kodwa liza kunyuka umnqantsa ngeCawe. Nangona ikwazile ukudlulela phambili kwiBrutten - kodwa inako ukugqwidiza okuthile kwindlela edlala ngayo.
Iza kudibana neWSU All Blacks ekhohlakeleyo kakhulu. Ngaphandle kweYoung Leopards, kukhangeleka ngathi yiWSU All Blacks enokuthatha indebe ngenxa yabadlali bayo abazimiseleyo. Iqela eliphumeleleyo liza kufumana indebe nemali angamashumi amathathu amawaka erandi (R30 000).