UPitso Mosimane unikwe isidanga sembeko yiJohannesburg University
Kanye xa eza kufinca amashumi amathandathu eminyaka esidla amazimba, uPitso Mosimane uthiwe jize ngesidanga sobugqirha yiJohannesburg University emsithweni obubanjelwe eGoli emini izolo.
UMosimane, ekuthiwa nguJingles xa bemteketisa ebholeni ekhatywayo, uwongwe yenye yeeyunivesithi eziphambili kwicandeli lemfundo enomsila eMzantsi Afrika ngenxa yokugqwesa kwakhe ekuqeqesheni okuhambe neendlela ezintsha zolawulo ebholeni ekhatywayo ngokubanzi.
UMosimane waqala ukudlala ibhola ekhatywayo ngo1982. Waqala ukudlala kwinqanaba eliphezulu kwiJomo Cosmos FC. Emva koko wadlalela iMamelodi Sundowns ne'Orlando Pirates phambi kokuya eYurophu - apho adlale kumazwe afana neGreece, Belgium naseQatar.
Kanti wakhe walidlalela neqela lesizwe ekuqaleni kokubuyiselwa koMzantsi Afrika emidlalweni yamazwe ngamazwe kwiminyaka yoo90 emva kokusikwa iminyaka emininzi ngenxa yorhulumente wobandlululo.
UJingles waqala ukuqeqesha iRita Berlaar yaseBelgium ngo1995. Emva koko wabuyela kwiSundowns - apho wanikwa uxanduva lokuqeqesha iqela labadlali abancinane nguTed Dumitru. Yamthatha emva koko iSuperSport United wayokuncedisa uBruce Grobbelaar.
Emva kokuhamba kukaBruce, uMosimane wathatha iintambo, wakhula njengomqeqeshi waphumelela iindebe. Kukuqhuba kwakhe kakuhle kwiSuperSport okwabangela enziwe isekela kwiqela lesizwe. UMosimane ukwamkele ngovuyo ukuwongwa khwe izolo.
"Ndiziva ndiwongekile emva kokuqatshelwa kanje yiyunivesi yaseJohannesburg. Oko ndandingumfundi ebholeni ekhatywayo, nangoku ndisenguye. Ibhola sisixhobo esinamandla senguqu futhi ingumthombo ompompoza ithemba iphinde ibe liqonga lokufundisa nokukhuthaza isizukulwana esilandelayo.
“Lona iwonga endilinikiweyo ngumvuzo wokusebenza ngokuzimisela nokubambisana nabo bonke endisebenze nabo," utshilo uPitso. "Imfundo nezemidlalo ziintsika ezimbini ezinefuthe entlalweni yoluNtu. Ndinephupha lokwakha isikolo sam apho kuza kuveliswa abadlali abasemgangathweni ophezulu.
“Ngeli wonga, ndinethemba lokuba ndiza kukhuthaza abantu abatsha endinethemba lokuba baza kubona ukubaluleka kwemfundo," utshilo uPitso ongomnye wabaqeqeshi abaphambili kwiAfika. Wavusa iSundowns wathathwa iindebe eziquka iChampions League neSuper Cup. Wenza ezibukwayo kwiAl Ahly phambi kokuya eSaudi Arabia.