Ezemidlalo

Umqeqeshi ucacisa umsebenzi kaJali ovuswe ethatha umhlalaphantsi

Pedro Mapelo|Published

Umqeqeshi weChippa United, uThabo September, uxelele iintatheli kutshanje ukuba uAndile Jali unomsebenzi aza kuwenza eqeleni ngaphandle kokudlala ibhola ebaleni. Ekuqaleni kwale nyanga, uJali ube ngomnye wabadlali bokuqala abatsha ababhengezwe yiChippa United.

UJali unethuba elide engayidlali ibhola futhi ukhuluphele nasemzimbeni. Wagqibela ukudlalela iMoroka Swallows phambi kokuyishiya ekuqaleni konyaka ngenxa yeengxaki zayo zemali ezikhokelele ekuthengisweni kwayo.

Ethetha kwisikhululo sikanomathotholo saKwaZulu-Natal kutshanje, uMike Makaab, uvumile ukuba uJali ebesele ezixelele ukuba uza kubeka phantsi njengomdlali webhola ekhatywayo kwinqanaba eliphezulu. UJali ngumdlali owaziwayo eMzantsi Afrika kakhulu.

Wazenzela igama elihle kumaqela aquka AmaTuks, i'Orlando Pirates, iMamelodi Sundowns neqela lesizwe loMzantsi Afrika. Kanti akuphelelanga apho ngoba ukhe wadlala naseBelgium phambi kokubuyela kwiSundowns isephantsi kwesandla sikaPitso Mosimane.

"Ebesele ethathe umhlalaphantsi engqondweni yakhe uJali. Siye sathetha naye ngoba siyaqonda ukuba usengumdlali onefuthe kakhulu ebholeni. Akasenawo amandla njengakuqala. Lo nto ithethe ukuthi kufuneka simsebenzise ngobuchule," utshilo uSeptember ethetha neentatheli eGoli emva kokufumana isetifiketi sokuqeqesha (CAF B Coaching License).

"Sinabadlali abasakhulayo abaliqela. Sisondeze yena ukuze asincedise ngokubabonisa indlela izinto ezenzewa ngayo kwinqanaba eliphezulu. Unomsebenzi omkhulu aza kuwenza kwisizini ezayo.

"Sinethemba lokuba uza kusinceda nakwicala lokutsala abalandeli ngoba ungumdlali othandwayo futhi ngowalapha eMpuma Koloni. Akazelanga ukudlala ibhola kuphela. Isizini iza kuqala esazama ukuzilungiselela ngoba sifuna adlale umzimba wakhe ukwisimo esimvumelayo ukuba adlale.

“Siza kumnika ithuba lokusebenza umzimba wakhe ude ulunge," utshilo uSeptember. Abanye abadlali abatsha kwiChippa United baquka uGiovanni Philander, Aphelele Teto noThobani Jacobs. Oku kwenzeka emva kokuba kukhululwe inqwaba yamadlali abalishumi elinesithandathu yiChippa United.