Ukuzithemba kuphezulu enkampini yaBafana Bafana!
Abadlali aphambili ebholeni yaseMzantsi Afrika, uPercy Tau noRonwen Williams, bathi aBafana Bafana bangayiphumelela iAfrica Cup of Nations ezayo. Oku kuthethwe ngaba badlali babini kwiintsuku ezigqithileyo enkampini eseGoli phambi komdlalo wokucweya ophakathi kwaBafana Bafana neNamibia oza kube use’Orlando Stadium ngentsimbi yesithathu emalanga ngomso. Umdlalo wangomso ngomnye kweliqela ezayo uMzantsi Afrika ozilungiselela ngayo njengokuba kusondela iAfcon esekuqaleni konyaka ozayo, e-Ivory Coast. UMzantsi Afrika uzibekele indawo kwiAfcon ezayo emva kokuphoswa zezidlulileyo ngenxa yokungaqhubi kakuhle.
Wagqibela kweka2019, eYiphutha. “Sizimisele ukwenza kakuhle ngaphezulu kunetumente esigqibele kuyo,” utshilo uTau odlalela iAl Ahly. “Sicinga ukuba sineqela elomeleleyo xa nabadlali abonzakeleyo bephilile. Kwezayo iAfcon siza kwenza ezibukwayo. Sicinga ukuba ithuba lokubuya nendebe likhona,” utshilo uTau. Ukuzithemba kufunqukile enkampini yaBafana Bafana ukusukela oko bathi babetha iMorocco ngamagowuli amabini kwelinye emdlalweni owawuvutha bhe eFNB Stadium. “Njengokuba sisiya kwitumente yezwekazi le’Afrika, into ebalulekileyo kuthi kukuzithemba futhi sizixelele ukuba singabuya nayo.
“Umqeqeshi wethu uthi sithelekiswe ngamaqela anzima – kodwa sizimisele ukwenza into engazange yenziwa,” uvale ngaloo mazwi uTau. Naye uWilliams waleke umsundulo ngelithi uHugo Bross uyayazi indlela ngoba wakhe wayiphumelela iAfcon esengumqeqeshi weCameroon. “Sinomqeqeshi onamava futhi okhe wayiphumelela iAfcon ngaphambili. Unalo iqela elingenza into efanayo naleya wakhe wayenza. Ukuba sikhe sadlula kwisigaba sokuqala setumente, ukuphumelela indebe iza kuba yeyona nto ephambili kuthi,” utshi uWilliams odlalela iMamelodi Sundowns. Kwisithuba seentsuku ezintathu, aBafana Bafana baza kudibana neDemocratic Republic of Congo komnye umdlalo wobuhlobo.