Ibethwa ngumoya phezulu iDowns enyathele iPolokwane City
ULucas Rebeiro Costa ufake amagowuli amabini emdlalweni weDStv Premiership obuphakathi kweMamelodi Sundowns nePolokwane City obusePeter Mokaba Stadium namhlanje. Umfanekiso: ©Samuel Shivambu/BackpagePix
Amaqela adlala kwiDStv Premiership aza kunyuka umnqantsa ukuze afumane iMamelodi Sundowns ebaleka okwehashe lomdyarho kule sizini entsha. Iintshatsheli zeDStv Premiership ezikhuselayo ziyiphumelele yonke imidlalo yazo. Oku kulandela emva kokuba iSundowns inyathele iPolokwane City yadlula ngamagowuli amabini eqandeni emdlalweni weDStv Premiership obubanjelwe ePeter Mokaba Stadium ngorhatya lwanamhlanje. Iqela likaRulani Mokwena lithe ngcu phezulu futhi libethwa ngumoya emva kokuqokelela ishumi elinesibhozo lonke lamanqaku emidlalweni emithandathu eliyidlalileyo kule sizini. Amagowuli ephumelele ngawo iSundowns afakwe ngumdlali oyingozi, uLucas Ribeiro Costa, obhakuzelise umnatha emzuzwini weshumi elinesibini kwisiqingatha sokuqala somdlalo.
Igowuli lokuqala lithe gqi emva kokuwiswa kukaMarcelo Allende endaweni embi kakhulu. Uxanduva lokukhaba ipenela linikwe uCosta oyibeke emnatheni ibhola ngobuchule. Noxa iPolokwane City iliqela elikuthandayo ukudlala ibhola entle, namhlanje khange likwazi ngoba iSundowns ifake uxinizelelo ukusuka kumzuzu wokuqala emdlalweni. Kuvele kwacaca nje ukuba iSundowns ikhangela igowuli kwangoko ukuze iPolokwane ingabinawo amandla okuhamba umgama omde. Kuyiwe kwixesha lokuphumla inkqenkqeza phambili iSundowns ngegowuli elinye. Kwisigaba sesibini, khange kubekho mahluko ngoba umdlalo ulawulwe yiyo.
Kudlule nje imizuzu emihlani kwisigaba sesibini, uCosta wafaka igowuli lakhe lesibini emdlalweni wanamhlanje. Ebekhona amathuba okufaka elinye kodwa balwile abadlali bePolokwane City. Into encomekayo ngoCosta yindlela ayibethelele ngayo indawo yakhe kwiSundowns. Udlala kakuhle kakhulu noThemba Zwane noMarcello Allende. ULebogang Maboe, obenikwe ithuba elinqabileyo lokudlala, khange ahlale nemizuzu emihlanu ebaleni. Unikwe ikhadi elibomvu emva kokudlalisa kakubi umdlali wePolokwane City. ULehlohonolo Seema, obethe akayoyiki iSundowns, kufuneka abuyele emva kwakhona ayokuthatha amandla phambi komdlalo olandelayo. Amanye amaqela aza kuphumla ngempelaveki ngenxa yemidlalo yeMTN8 edlalwa ngamaqela amane.