Abethiwe Amakhosi adlale umdlalo odikidiki eTanzania namhlanje!
Akukho nto ingako enokubaliswa ngomdlalo weKaizer Chiefs eguqiswe phantsi yiYoung Africans SC ngo’1-0 emdlalweni wokucweya obubanjelwe eMkapa Stadium ngorhatya lwanamhlanje. UMolefi Ntseki uqeqeshe iChiefs namhlanje eTanzania okokuqala ukusukela ethe wanikwa esona sihlalo esishushu ebholeni ekhatywayo yaseMzantsi Afrika kwinyanga ephelileyo. Nangani ebefake abadlali bakhe abatsha abaquka uThatayaone Dithlone, uGiven Msimango, uEdison Castilo, uPule Mmodi, uMduduzi Mdantsane noTebogo Potsane - kodwa indlela elidlale ngayo ibidikidiki. Zibekhona iintlantsi phaya naphaya kubadlali abafana noDithlone nakuMmodi - kodwa abadlali beYoung Africans khange bafumane bunzima tu kwiChiefs.
Nangona nayo iYanga, eqeqeshwa nguMiguel Angel Gamondi owakhe waqeqesha iMamelodi Sundowns, ilungiselela isizini entsha - kodwa idlale ngokuzimisela kakhulu phambi kwashumi amathandathu amawaka abalandeli bayo abe bezalise iMkapa Stadium namhlanje. UKapteni weChiefs, u’Itumeleng Khune, uvale iibhola ezimbalwa kwisigaba sokuqala somdlalo phambi kwegowuli elihle elifakwe nguKennedy Musonda obezimisele kanye phambi kokusongwa kwesigaba sokuqala somdlalo. Iqela laseTanzania lizilawule zozibini izigaba zomdlalo okweqela elingakhange lithathe ikhefu. Ebekhona amaxesha ebidlala ibhola entle iChiefs - kodwa ibiphoxwa kukubhutyuza xa ifika emhlabeni oyingozi weYoung Africans.
Ukungena kwabadlali abafana noMduduzi Shabalala noNkosingiphile kuwenzile umahluko phaya naphaya emdlalweni - kodwa iinzame zabo azenzanga mahluko . Kuye kwanyanzeleka uBrandon Peterson avale iibhola ezimbini ezimbi ebeziyingozi emva kokuthatha indawo kaKhune kwisigaba sesibini somdlalo. Ude wakhutshwa uChristian Saile kungekho nto ayenzileyo - kodwa bezingekho iibhola azinikwa kakuhle. Eyona nto ebembi emdlalweni odikidiki edlalwe yiChiefs kukuba ayikwazanga ukudala amathuba acacileyo emdlalweni njengakwisizini ephelileyo. Amakhosi aza kudlala omnye umdlalo wobuhlobo neTownship Rollers yaseBotswana kwiveki ezayo. Kunyanzelekile apho iqela likaNtseki lizibonakalise ngoba liza kudibana neChippa United emdlalweni wokuqala wesizini entsha eThekwini.