ISebe lezoLimo liza kunikezela ngoomatshini bokulima nokuthunga eMatatiele
Umphathiswa wesebe lezolimo eMpuma Koloni uNonceba Kontsiwe.
Image: ECDoA / Facebook
Isebe lezolimo eMpuma Koloni liza kunikezela ngoomatshini bokuthunga kwakunye noomatshini bokulima ababini ngelizama ukukhuthaza uqoqosho lwasekuhlaleni ngokuvelisa ukutya, ukuthengisa izinto zobugcisa nezezandla kwanempahla kwilali yaseZwelitsha eMatatiele.
Le yinxalenye yeenzame zesebe lokuqhubeka nokuxhobisa abasetyhini nolutsha. Unikezelo luza kwenzeka ngomso ngoLwesithathu, umhla weshumi kweyoMnga 2025 ngentsimbi yeshumi kusasa.
Kuthiwa uMphathiswa weli sebe, uNonceba Kontsiwe, uza kunikezela ngokusesikweni oomatshini ababini bokulima kookopolotyeni baseMatatiele abakhokelwa lulutsha namanina kwakunye noomatshini abangamashumi amathathu, ivili lezinto ezenziwa ngodongwe kunye nomatshini wokuvelisa izinto zodongwe.
"Iinjongo zeR504 224 echithwe koomatshini kunye neR198 000 yotyalomali koomatshini bokulima kukubonelela ngeendlela zokuvelisa kumafama asakhasayo nokudala amathuba emisebenzi ngakumbi kulutsha, abasetyhini kunye nabantu abakhubazekileyo futhi nokuphelisa indlala," itshilo ingxelo yesebe.
Isebe lithe ezi nzame zezokukhulisa imveliso yokutya okuziinkozo, imifuno, imfuyo, ukwandisa ukhuseleko lokutya nokukhuthaza uphuhliso lweempahla namalaphu njengamacandelo agxile kakhulu kuphuhliso lwamafama kunye namashishini amancinci asemaphandleni.
Isebe likwathe lichonge ezi zixhobo zingumthombo wengqesho kuninzi lwamanina angaphangeliyo, ulutsha kunye nabantu abakhubazekileyo.