Ukukhula kweemveliso zezolimo zaseMzantsi Afrika ezithunyelwa kumazwe angaphandle
Ikota yesibini ibonakalisa ukukhula kwicandelo lezolimo eMzantsi Afrika.
Image: Phando Jikelo/Independent Newspapers
Kubekho ukukhula kwicandelo lezolimo laseMzantsi Afrika, ukuthunyelwa kweemveliso zelizwe kumazwe angaphandle kunyukile kwikota yesibini yalo nyaka ukuya ngaphezulu kwekhulu lezigidi zeedola ($161 million) neyi26% xa kuthelekiswa nexesha elifanayo ngo2024.
UMphathiswa wezoLimo uJohn Steenhuisen uthe irhafu eyi30% ebekwe yiMelika kwiimpahla ezithunyelwa nguMzantsi Afrika ibonisa ukuba eli lizwe kufuneka lizame iimarike ezahlukeneyo zokuthumela ngaphandle.
"Ukumiselwa kutshanje kwerhafu eyi30% kwimpahla yethu ethunyelwa ngaphandle yiMelika kubonise imfuneko engxamisekileyo yokutshintsha iimarike zethu zokuthumela ngaphandle kunye nokwandisa ukhuphiswano lwethu ukunciphisa ifuthe loqoqosho lokuphulukana nokufikelela kurhwebo olukhethekileyo," utshilo.
USteenhuisen uthe iziphumo zekota yesibini ka2025 zikwabonisa ukuba kungxamiseke kangakanani ukusombulula iingxoxo eziqhubekayo zerhafu kunye neMelika. "Amandla ethu okufumana ukufikelela okuzinzileyo nelexesha elide kule marike ibalulekileyo ihleli iyinto ephambili," wongeze watsho.
Kwikota yokuqala ka2025, ukuthunyelwa kwemveliso zolimo zoMzantsi Afrika ukuya eMelika bekufikelele ngaphaya kwekhulu lezigidi zeedola ($118 million), kunyuke nge19%.
UMphathiswa wezoLimo uthe ukukhula akuyonto nje yamanani, kodwa kubonisa isivuno esikhulu, ukunyuka kwemveliso ekumgangatho ophezulu, kunye nokusebenza kakuhle kwamazibuko ethu.
"Iimveliso ezikhokelayo ziquka iintlobo ngeentlobo zeziqhamo ezifana neemveliso zeorenji, iidiliya, ama-apile namapere, kwakunye namandongomane newayini.
"Njengoko siqhuba uthethathethwano lozakuzo kwaye sisebenzela ukufumana isivumelwano sorhwebo esinomtsalane, kugxilwe ekuqinisekiseni ukuba amafama ethu kunye nabathengisi bangaphandle banokuqhubeka bephumelela kwimarike yehlabathi, ukukhusela ikamva lecandelo lethu lezolimo," utshilo.