ISebe lezoLimo likhuphe imvume yokuqala yokugonya iinkukhu
ISebe lezoLimo likhuphe imvume yokuqala yokugonya iinkukhu ukuthintela umkhuhlane weenkukhu.
Image: Umfanekiso ogciniweyo
UMphathiswa wezoLimo kuzwelonke, uJohn Steenhuisen, ubhengeze ukuba kwiintsuku ezizayo uMzantsi Afrika uza kuqalisa ugonyo lokuqala lweenkukhu njengenyathelo lokunciphisa umngcipheko wokuqhambuka komkhuhlane weenkukhu (HPAI).
Oku kulandela iphephamvume logonyo elikhutshwe liSebe lezoLimo nelinikwe iAstral Foods Limited ngomhla wama30 kweyeSilimela ka2025, ligunyazisa le nkampani evelisa iinkukhu ukuba iqalise ukugonya kwenye yeefama zayo zokufuya iinkuku.
ISebe lithi iphulo lokugonya liza kuqala ngeenkukhu zamaqanda ezingingama200 000, ezimele malunga ne5% yemfuyo yakwaAstral, eqikelelwa kwizigidi ezingamashumi amathathu anesihlanu zeerandi (R35 million).
USteenhuisen ukwamkele oku njengobungqina bentsebenziswano eyomeleleyo phakathi kukarhulumente kunye neshishini leenkuku ekukhuseleni ukhuseleko lokutya kuzwelonke kunye nokukhusela ubomi bamawakawaka abemi boMzantsi Afrika.
Ugxininise ukuba eli phulo lokugonya linyathelo elibalulekileyo lokomeleza ukhuseleko lomhlambi kunye nokuthintela ilahleko yezoqoqosho ebonwe ngexesha lokuqhambuka komkhuhlane weenkukhu wangaphambili.
Ukuqhambuka komkhuhlane weenkukhu ngo2023 kubangele ukuba kubulawe izigidi zeenkukhu, nto leyo ekhokelele kuphazamiseko olumandla lonikezelo oluchaphazela abavelisi kunye nabathengi.
Kutshanje, uMzantsi Afrika uye wavumela iimveliso zeenkukhu ezivela eBrazil ukuba zingene kwakhona kweli lizwe emva kokuba bezithintelwe kulandela ukuqhambuka komkhuhlane weenkukhu kwela lizwe. UMphathiswa wezoLimo eBrazil uqinisekise ukuba ukuqhambuka komkhuhlane weenkukhu kuye kwalawulwa.
Nangona kunjalo, uSteenhuisen uthe le meko ibekwe esweni ukuze xa kukho iingxelo zokuqhambuka komkhuhlane weenkukhu eBrazil, iimveliso zeenkukhu zela lizwe ezithunyelwa kweli zithintelwe ukuba zingene eMzantsi Afrika kwakhona.