Abafundi baseMelika bafunda ngezolimo eMzantsi Afrika
Abafundi baseMelika bencanca ulwazi eARC ePitoli.
Image: ARC
Ngabantu abatsha abalishumi elinanye abaphuma kwilizwe laseMelika abafumana uqeqesho olulodwa kwezolimo kwibhunga elijongene nophando ngezolimo kweli iAgricultural Research Council (ARC).
Eli qela labafundi liphuma kwiziko lemfundo iBerry College eMelika beza kufuna ulwazi olunzulu ngezolimo kweli ziko iARC.
IARC ihamba phambili ngokuba lelona ziko elenza uphando olubanzi ngemicimbi yezolimo eyahlukeneyo, ngenxa yoku ixhobisa amafama ngolwazi.
Uphando nzulu olwenziwa yiARC lunceda amaziko emfundo ephakamileyo, abezoshishino kwakunye nabo bakhathalele impilo yezilwana.
IARC inamaziko ahlukeneyo kweli amancinane ajongene nokwenza uphando ngemicimbi eyahlukeneyo yezolimo.
Ingxelo ithi okona kuphambili kumsebenzi owenziwa ngaba bafundi kukufundiswa nzulu ngeendlela ezahlukeneyo zokwenza uphando kwezolimo. Ukutyelela iifama zokulima kwanezo zifuye imfuyo kube yinxalenye yophando lwaba bafundi.
Uphando nzulu ngezolimo ngumqolo wokuveliswa kokutya ngeendlela ezihambelana nala maxesha. Kuphando lwabo, aba bafundi kulindeleke ukuba bafunde banzi ngeendlela zokudibanisa ulwazi lakudala nenzululwazi ekhatshwa ziindlela zala maxesha.
Ilizwe laseMelika lineenkampani ezingamakhulu amathandathu ezisebenza kweli kwimikhakha eyahlukeneyo yezoshishino kuquka nezolimo.