Wandile Sihlobo: Ingaba bubalulekile ubuhlobo boMzantsi Afrika neMelika?
UWandile Sihlobo ukhankanya ukuba kutheni kubalulekile ukuba uMzantsi Afrika ube namaqhina entsebenziswano neMelika.
Image: Umfanekiso ogciniweyo
Ingcali yezoqoqosho kwezolimo uWandile Sihlobo ubalule izizathu eziphambili ezinyanzelisa uMzantsi Afrika ukuba ucenge ubudlelwane nelizwe laseMelika, ngokukodwa mayelane neemveliso zolimo.
Kwikhasi lakhe lezonxibelelwano uSihlobo uthetha ngemicimbi eyahlukeneyo mihla le exhobisa uluntu ngezinto eziphambili, ingakumbi kuqoqosho lwezolimo.
Ngamakhulu amathandathu iinkampani zaseMelika kweli ezenza ushishino kwimikhakha eyahlukeneyo yoqoqosho.
"Ubudlelwane boMzantsi Afrika neMelika bubaluleke ngamandla ngenxa yezizathu ezibini eziphambili nangona zikhona ezinye, utyalo mali olwenziwa ziinkampani zaseMelika kweli, ubudlelwane neenkampani zabo ezithengisa iimveliso zethu zolimo – ezo zezona zizathu ezinyanzela ukuba icengwe iMelika," ucacise watsho uSihlobo.
Oku kusemva kwesankxwe sezigxeko ezisuka kwiinkokeli zezopolitiko, ezinye zisithi uMongameli weli uCyril Ramaphosa uthengisa ngelizwe.
"Maninzi kakhulu amathuba emisebenzi adalwe ziinkampani zaseMelika kweli, ngoko ukuqhawuka kwamaqhina nabo kungachaphazela iintsapho ezininzi kakhulu, logama kunokubetheka kakhulu uqoqosho," ucacise watsho uSihlobo.
Kwikhasi lakhe elithi AgriView, uSihlobo uxoxa exovula imicimbi yezoqoqosho ekwaxhobisa uluntu ngolwazi, ingakumbi amafama.
Ubuxoki beengxelo zokuba kubulawa amafama amhlophe kweli ekwathathelwa nemihlaba kwabangela ukuba urhulumente waseMelika awanike igwiba lokhuseleko njengeembacu kwela lizwe.
"Iimveliso zolimo zelizwe loMzantsi Afrika zithengiswa kakhulu kwilizwe laseMelika, iindidi ngeendidi zeemveliso zethu zithengiswa kwela lizwe, ngoko ke kuhle ukuhlala sisebenzisana neMelika," kutsho uSihlobo.
Eminye imibutho yezopolitiko kweli imncomile uRamaphosa ngokuzenza idini esiya kuthethelela eli lizwe eMelika.