Ziyaphumelela iinzame zokulwa isifo somlomo
Iinzame zikarhulumente zokulwa isifo somlomo ziyaphumelela.
Image: Umfanekiso ogciniweyo
Ingxelo ekhutshwe liSebe lezoLimo kweli ibonisa ukuba ngenene ayasebenza amalinge weli Sebe ukulwa isifo somlomo esihlasele amaphondo athile kweli ukusukela ekupheleni konyaka ophelileyo.
UMphathiswa wela Sebe uJohn Steenhuisen uzive engenakuthula ngomsebenzi owenzekayo kwiinzame zeSebe lakhe ukulwa isifo somlomo kwimfuyo equka iinkomo, iigusha neebhokhwe.
"Ukuvela kwesi sifo kwanyenzela ukuba kumiselwe imiqathango ethile malunga nokuhanjiswa okanye ukuthengiswa kwemfuyo kumaphondo amabini aquka iLimpopo kwakunye neMpuma Koloni," kutsho uSteenhuisen.
Uthi ngenxa yomsebenzi onzima owenziwe liSebe lakhe kwakunye nentsebenziswano yamafama kukho inguqu malunga ndlela ekuzakuqhutywa ngayo.
"Sifake isicelo samachiza okuthintela ukunwenwa kwesi sifo kwakunye nezinye izifo ezihlasela imfuyo, ngumyinge wemali ekumashumi asixhenxe anesibini eza kusetyenziswa kulo msebenzi," uhambisa atsho uSteenhuisen.
Iingingqi eziquka iKouga kwakunye neKou-Kamma eMpuma Koloni beziphantsi kwemiqathango ejoliswe ukuthintela ukunaba kwesifo somlomo.
"Ukusukela ngeyeKhala kunyaka ophelileyo iindawo ezithile zeMpuma Koloni beziphantsi kwemiqathango ejoliswe ukunqanda ukunaba kwesifo somlo, kodwa ngoku sele kumbovu ukuba inqunyanyiswe loo miqathango," uqhayise watsho uSteenhuisen.
Zingaphezu kwekhulu namashumi amane anesine izilwanyana ezithe zafumana ukugonywa zigonyelwa isifo somlomo kuzwelonke ngelizama ukunqanda ukunaba kwesi sifo, itsho ingxelo.
"Kwinyanga ephelileyo uTshazimpuzi kufunyenwe iimpawu zesifo somlomo kwiphondo laseLimpopo, konke oko kuphantsi kweliso elibukhali lamagosa ethu," ucacise watsho uSteenhuisen.