Inkongolo yamafama eAvokhado eKenya
Amafama eAvokhado aza kudibana eKenya ukwabelana ngeendlela zokwandisa imveliso.
Image: iStock
Amafama aphuma kwiimbombo zone zehlabathi aza kudibanisa iintloko eKenya ekupheleni kwale nyanga kaCanzibe ukuxoxa amacebo okukhulisa iiavokhado ehlabathini.
Umbutho iAvocado Society of Kenya (ASOK) ubambisene nemibutho ephambili kwihlabathi ukuvelisa iAvokhado, baza kuba bedibanise amafama, izifundiswa zolimo nabezoshishino ukuxoxa banzi ngekamva leAvokhado.
Ilizwe loMzantsi Afrika liyaziwa kumazwe avelisa iiAvokhado kwihlabathi nanjengoko amafama aziwa kumaphondo aquka iMpumalanga, iLimpopo neNtshona Koloni.
Le nkongolo kulindeleke ukuba ixoxe banzi imicimbi equka amacebo okuphucula umgangatho wemveliso yeAvokhado, ukhuseleko lesivuno nokuvelisa ukuqhubeka kungemi kwihlabathi ngokubanzi.
Amacebo okuthengiswa kweAvokhado kwihlabathi yeminye yemicimbi eza kuxoxwa kule nkongolo ngelizama ukukhulisa ingeniso kumafama eAvokhado.
UErnest Muthomi ngumphathi weASOK, uqhayisa ngomsebenzi owenziwa ngamafama aseKenya kwimveliso yeAvokhado kwihlabathi.
"Ilizwe laseKenya lisahleli lihamba phambili ngokuvelisa iAvokhado kwihlabathi, kungoko sizimisele ukunika amafama wehlabathi ithuba lokuxoxa izisombululo kwiingxaki zokuveliswa kweAvokhado kwihlabathi," kucacisa uMuthomi.
Kuqikelelwa ukuba imveliso yeAvokhado eKenya iza kukhula ngomyinge weepesenti ezintandathu ekhulwini kulo nyaka ka2025.
Oku kuthetha ukuba iza kukhula imveliso yeAvokhado eKenya isiya kwikhulu elinamashumi amathathu anesihlanu eetoni ngonyaka ukusukela kulo nyaka ka2025.
Amafama eAvokhado kwela lizwe aqikelela ukuba imali eza kungena ngenxa yeeAvokhado ingaqikelelwa kwishumi elinanye leepesenti ekhulwini.
Ukusukela ngomhla wamashumi amabini anesixhenxe kule nyanga ukuya ngomhla wamashumi amathathu, amafama eAvokhado kwihlabathi aza kuxoxa banzi ngeendlela zokukhulisa iAvokhado kwihlabathi.