Uqalile umboniso wezolimo iNampo eBothaville
Nampo Owona mboniso umkhulu wamafama eMzantsi Afrika iNampo.
Image: Facebook
Imvula ethathe iintsuku inetha kwingingqi yaseBothaville eFreyistata ibangele amathandabuzo kuninzi malunga nokuqhubeka komboniso wokuvuna iNampo.
Lo mboniso uza kuqhubeka usukela namhlanje umhla weshumi elinesithathu ukuya kuma kumhla weshumi elinesithandathu.
INampo iququzelelwa ngumbutho weGrain South Africa ngeenjongo zokunika amafama ithuba lokuba abuthelane ndawoninye abukele ukuvunwa kweemveliso zeenkozo eziquka umbona nojongilanga.
Abaququzeleli baqinisekise ukuba ngenene lo mboniso uza kuqhubeka ngaphandle kwengxaki nangona bebephazanyiswe yimvula. Kukhutshwe amaqela okuzama ukuphungula amanzi ezindleleni, emasimini nakwezinye iindawo ebezichatshazelwe yimvula enethe ngamandla eBothaville ngeenjongo zokuvula amasango kwabo baza kuba ziindwendwe.
Lo mboniso utsala umdla kumafama, abezoshishino, izifundiswa zolimo noluntu ngokubanzi, kuquka nabo baphuma kumazwe ehlabathi.
UDirk Strydom ongumlawuli weqela eliququzelela lo mboniso uthi benza konke ukuzama ukuqinisekisa ukuba konke kuhamba kakuhle.
"Siyibeke phantsi kweliso elibanzi yonke imeko, sithumela amaqela ethu ukuba enze konke ukuzama ukuqinisekisa ukuba umboniso wethu awuphazanyiswa, kwaye yonke into ihamba kakuhle," kutsho uStrydom.
Ukuba imvula ibingayekanga, ngekuphazamise ngokumandla ukuboniswa esidlangalaleni kweemveliso zeenkampani ezingaphaya kwewaka.
"Ukuvela kwelanga kwakhona kubuyise ithemba lokuba ngenene amalungiselelo ethu aza kuba semgangathweni kuba sizimisele ukwenza owona mboniso ukwizinga eliphezulu kulo nyaka," kutsho uStrydom.
Ngenxa yamanzi emvula enethe kwingingqi yaseBothaville kunyanzeleke ukuba kuvalwe uhola wendlela uR30 phakathi kweBothaville kwakunye neOrkney.