UGqirha Mark Chimes ngumlawuli omtsha weMilk SA.
Image: Uthunyelwe
Umbutho ojongene nemveliso yobisi kweli iMilk South Africa, ityumbe uGqirha Mark Chimes, ukuba ajongane nolawulo lwempilo yeenkomo ezivelisa ubisi kuMzantsi Afrika egameni lalo mbutho.
Owona msebenzi wakhe uphambili kukuqaphela nokuqinisekisa ukuba iimfuno zamafama obisi kweli ziyaqatshelwa, ukukhathalelwa kwempilo yeenkomo ezivelisa ubisi nokuphuhliswa kwemveliso yobisi ngokubanzi. Umbutho iMilk SA, ulilungu lombutho iNational Animal Health Forum, ukwalilungu leLivestock Welfare Coordinating Committee eenjongo zayo ikukukhusela impilo yezilwanyana.
IMilk SA ikwanoxanduva lokuxhasa ngezimali umbutho iSouth African National Committee of the International Dairy Federation. IMilk SA ikwalilungu lombutho ombaxa ongugalelebhayini i-International Dairy Federation, ejongene nemveliso yobisi kwihlabathi ngokucholachola imibutho evelisa ubisi kwihlabathi.
Ethetha namajelo eendaba uGqirha Chimes, uthi ngenene kukho imfuneko yokuba kusetyenzwe nzima ngamafama obisi kuMzantsi Afrika nakwihlabathi ngokubanzi ukuze kunyuswe umyinge wobisi oluveliswayo.
"Imveliso yobisi igagene nengxaki yokuba kuhle umyinge wobisi oluveliswayo ukusukela ngonyaka ka2020, kuye kwabakho inguqu entle ngo2024, kodwa izinto azintlanga kulo nyaka kufuneka kukhuliswe imveliso yobisi,” kutsho uChimes.
UBertus van Heerden ukwangumlawuli weMilk SA, uthi unethemba lokuba uGqirha Chimes, uza kwenza utshintsho kulo mbutho.
"Ungena kanye ngexesha apho amafama obisi kwihlabathi nakuMzantsi Afrika ajongene neengxaki ezininzi ezifuna ubani obambisana nabanye asebenza nabo, unamava afunekayo kwiMilk SA," kutsho uVan Heerden.