Umbhiyozo weembotyi zeSoya eRhawutini.
Image: iStock
UMphathiswa weSebe lezoLimo kuzwelonke uJohn Steenhuisen ebeyinxalenye yombhiyozo weembotyi zohlobo lweSoya ezilinywa ngamandla ngamafama aseMzantsi Afrika.
Lo mbhiyozo uqhutyelwe kwifama iKievits Kroon kwiphondo laseRhawutini ngeenjongo zokuqwalasela iindlela zokukhuliswa kweemveliso zeembotyi zeSoya kweli.
Imiceli mngeni namacebo anokwenziwa ukukhulisa imveliso yeSoya eMzantsi Afrika yenye yezinto ezixoxwe banzi kule ndibanisela yamafama oMzantsi Afrika.
URussell du Preez ngumfama ovelisa iimbotyi zeSoya ekwangumququzeleli walo msitho wokubhiyozela iimbotyi zeSoya.
"Iimbotyi zeSoya azisezo mbotyi zijongelwe phantsi koko ziimbotyi eziyinxalenye yeemveliso eziphambili zolimo, lifikile ixesha lokuba sizinike indawo yazo ehloniphekileyo kuluhlu lwezityalo eziphambili kweli," kutsho udu Preez.
Uhambisa athi batyala ezi mbotyi ngexesha apho ilizwe loMzantsi Afrika nehlabathi lijongene nomceli mngeni wezinto ezininzi eziwenza nzima umsebenzi wokulima nokufuya.
"Sidibana apha ngexesha apho iimveliso zethu zolimo nokulima kugagana neengxaki ezininzi ezinokutyhafisa amafama amaninzi, iingxaki zemozulu eguqukayo, amaxabiso worhwebo nezinye iindawo," kutsho udu Preez.
Unyaka ka2024 ngowona nyaka iimveliso zeembotyi zeSoya ziye zaveliswa ngamandla lenyuka izinga nenani lazo.
Ilizwe laseBrazil lelinye lamazwe ahamba phambili ngoku ngokuvelisa iimbotyi zeSoya ngomyinge weepesenti ezintandathu ekhulwini. "Ilizwe laseZambia, Mozambique neMalawi ngamanye wamazwe ahamba phambili ngokuvelisa iimbotyi zeSoya kweli laseAfrika," kutsho udu Preez.
Ubudlelwane boMzantsi Afrika namazwe eBRICS kuyancedisa ukuthengisa iimbotyi zeSoya zeli loMzantsi Afrika, kutsho udu Preez.