Ingadluma ugandaganda weCase IH Puma.
Image: Case IH
Iinkampani ezivelisa oogandaganda zikhuphisana ngokufana ncam neenkampani ezivelisa iimoto. Inkampani iCase IH ivelise ugandaganda omtsha oza kuba yimpendulo kuninzi lweengxaki zamafama alimayo kweli loMzantsi Afrika.
Izinga lobuchwephesha likwanyanzelisa ukuba ezi nkampani ziqinisekise ukuba zihlala zivelisa izixhobo zokusebenza efama ezifana noogandaganda abasemgangathweni.
Amafama asebenzisa oogandaganda afuna ukubona izinto ezininzi eziza kwenza ukuba umsebenzi wenzeke ngexesha elincinci, logama kukwavelisa imveliso esemgangathweni. Ugandaganda omtsha wakwaCase IH obizwa ngokuba yiPuma uqulethe ukuthembeka kwakunye namandla adingwa ngamafama emasimini.
UAndre Olwagen ujongene neenzame zokuthengiswa kweemvelisa zakwaCase IH kuquka nale ngcanduva intsha iPuma. "IPuma 185, 200 kwakunye ne220 zixhobe ngamandla kwakunye nobuxhakaxhaka bala maxesha obundingwa ngamandla ngumfama emasimini," kutsho uOlwagen.
Phantsi kwegama elithi Puma, le nkampani ivelise iindidi ezintathu zoogandaganda – omnye oqulethe zonke iimfuno zomfama. "Konke okuhambelana nobuchwephesha kuyafumaneka kulo gandaganda, uqulethe amandla angaphezu kwenkabi yehashi, sithembisa imveliso esemgangathweni kumafama," kutsho uOlwagen.
Uthi iinjineli zabo zisebenze nzima ukuqinisekisa ukuba ngenene bakhupha ugandaganda oza kuncedisana namafama kumsebenzi wokulima. "Ubukhulu bamavili kwenza ukuba umfama akwazi ukuyisebenzisa nakwezinye izidingo zakhe zasefama, ezo ziquka ukutsala ezinye iinqwelo ezidinga oko, nokusebenza ngamandla kwimihlaba eqala ukulinywa," kutsho uOlwagen.
Nangona liphelelwa ixesha lokusebenzisa oomatshini abaqhutywa ngabantu, kodwa ugandaganda usezakuhlala ekhona emasimini. "Lo ugandaganda ungamchaza uthi yiofisi ehambayo, kuba ukuqulethe konke okufunwa ngumfama, umqhubi ubona yonke into ngokufanelekileyo ngenxa yendlela eyakhiwe ngayo, esenza oko logama ekwazi ukumamela unomathotholo nezinye," kutsho uOlwagen.