Ilizwe laseChina livule iingcango zalo kumafama eAvokhado aseMzantsi Afrika
Image: Alexis Foto Guevara/Shutterstock
Amafama weAvokhado oMzantsi Afrika akwiphulo lokwandisa umyinge weAvokhado yawo ethunyelwa kwilizwe laseChina emva kokuba ela lizwe lenze isimemo kumafama weli.
Kunyaka ophelileyo u2024, amafama weAvokhado eli loMzantsi Afrika athumele umthwalo weAvokhado okumashumi amabini ananye weetoni kwilizwe laseChina.
UDerek Donkin ongumphathi wombutho weziqhamo eziquka iAvokhado, iSouth African Subtropical Growers' Association, ukuvulwa kweengcango ngurhulumente waseChina kuthetha lukhulu kubo.
"Oku kuza kwenza ukuba ngenene ikhule imveliso yeAvokhado eMzantsi Afrika, kaloku iChina ihamba phambili kwihlabathi ngokuthanda nokuvelisa iimveliso ezininzi ngeAvokhado," kutsho uDonkin. UHans Boyum yena usuka kumbutho weWestfalia Fruit neyathi yaba yeyokuqala ukuthumela iziqhamo zeAvokhado kwilizwe laseChina kweli loMzantsi Afrika.
"Kulindeleke ukuba unyuke ngenene umyinge weAvokhado yethu ethengiswa kwilizwe laseChina, oku kungenxa yokuba abantu bela lizwe bakhulelwa lulwazi ngeenzuzo zempilo zokutya iAvokhado," kucacisa uBoyum.
UBoyum uthi uMzantsi Afrika unamathuba amahle okukhulisa umyinge weAvokhado yawo ethunyelwa kwilizwe laseChina. "Sinethuba elihle ngenxa yokuba umzila ohanjwa zizikhephe ezisuka apha eziya eChina uthatha ixesha elincinci xa uwuthelekisa namanye amazwe athula iimveliso zawo eChina," uhambisa atsho uBoyum.
UBoyum uthi ngaphandle kwamathandabuzo uza kukhula umyinge weAvoakhdo yeli ethunyelwa kwilizwe laseChina kunyaka mali u2025/2026. Ilizwe loMzantsi Afrika lixhamla ngamandla kwintsebenziswano ephakathi kwala mazwe mabini ngenxa yobudlelwane beBRICS.
"Uninzi lwamazwe aseAsia aqalisa ukukhulelwa ngumdla kwiimveliso zeAvokhado yeli ebizwa ngokuba yiFuerte nekulindeleke ukuba ibenegalelo elimandla ekukhuleni komyinge esiwuthumela kumazwe aseAsia," kutsho uBoyum.