UKontsiwe uphucula imihlambi yeegusha eOR Tambo

Ukuphucuka komgangatho weegusha eziveliswa ngabantu basezilalini kuxhomekeke kwintsebenziswano phakathi kwabo, iinkampani zabucala, amafama amakhulu kwakunye norhulumente.

Oku kwenziwa ngeenjongo zokuba amafama afuye iigusha ngeenjongo zokuba avelise uboya obaneleyo nobusemgangathweni kananjalo.

UMphathiswa weSebe lezolimo eMpuma Koloni, uNonceba Kontsiwe, unikise ngeegusha kumafama aseOR Tambo eqhubela phambili iphulo ekukudala lisenziwa ngurhulumente.

“Ngamakhulu amathathu weegusha esinikise ngawo kumafama oMasipala wesithili saseOR Tambo, ziquka iinkunzi zoboya kwakunye namathokazi ngokunjalo, sizinika ke amafama avelisa uboya kule ngingqi,” ucacise watsho uKontsiwe.

Umfama wegusha uMabhozo Yilo waseZilanda kuQumbu watshelwa ziigusha ezilikhulu kwintlekele yomlilo kunyaka ophelileyo – naye uthe wafumana.

UYilo ufumene iinkunzi zeegusha ezintandathu zohlobo lweDohne Merino, injongo kukuba avuselele umhlambi wakhe, ekwaphucula nomgangatho weegusha aza kuzivelisa.

Ngaphambili, uYilo wafumana ukutya kwemfuyo okwakusuka kuMphathiswa uKontsiwe, logama wathi wafumana neegusha ezazisuka kusomashishini uAce Ncobo.

“Sikwiphulo lokukhulisa imveliso yoboya, kwelinye icala, sizama ukuphucula umgangatho weegusha ezifuywa ngamafama weMpuma Koloni, iMpuma Koloni iyodwa ivelisa uboya obukumyinge weshumi elinanye lezigidi zeekhilogram, amafama amnyama wona avelisa izigidi ezihlanu zeekhilogram zoboya,” uqhayise watsho uKontsiwe.