Entsimini

Akukho sisombululo kwisifo senkukhu

Siyabulela Mqikela|Published

Ngelizama ukunqanda ukunaba kwesifo senkukhu esixake uMzantsi Afrika, ziinkukhu ezingaphezu kwezigidi ezisixhenxe esele zibulewe kweli.

Ingxelo ekhutshwe liSebe lezolimo malunga nesi sifo ithi ukuqhubeka kwaso kungahle kubangele ukunqongophala kwenyama yenkukhu namaqanda wazo.

UMphathiswa welaSebe uThoko Didiza ubambe indibano nombutho ojongene nokuveliswa kwenyama yenkukhu kweli ngelikhangela isisombululo. Kwiziganeko ezingamashumi amathandathu okuvela kwesi sifo ziinkukhu ezingamakhulu amabini anesihlanu amawaka. IPhondo laseRawutini lisahamba phambili okwangoku ngamanani wenkukhu ezosulelwe sesi sifo nesele zifile ezinye ngokubulawa okanye ukuzifela. Idolophu yaseJwanasibhegi nePitoli zizo eziqavile ukuba namanani aphezulu okufa kwenkukhu kwela phondo.

Iivenkile ezithile eRawutini ziqalisile ukuphungula inani lamaqanda athengwa ngabahlali ngelizama ukunqanda ukuphela kwamaqanda. Ziqikelelwa kwizigidi ezihlanu iinkukhu ezivelisa amaqanda esele zibulewe kweli ngelinqanda esi sifo.UIzaak Breitenbach weSouth African Poultry Association uthi linzulu inxeba lokuhlaselwa kwamafama sesi sifo."Ezi nkukhu zibuleweyo zikumyinge wamashumi amathathu akhulwini epesenti kuMzantsi Afrika uwonke, yingxaki enkulu le kuzwelonke nakumazwe angabamelwane,"kutsho uBreitenbach.

Kwelinye icala uRhulumente weli wenza amalinge okuba kuthengwe amaqanda kumazwe angaphandle ukuzamaq ukuthintela ingxaki."URhulumente uzakuma ukukhawulezisa inkqubo yokuba kuthengwe amaqanda kumazwe angaphandle, injongo kukuqinisekisa ukuba sinamaqanda awaneleyo,"kutsho uDidiza. Ingxelo yeliSebe ithi lukhula ngokungxama inani leefama zeli ezosulelwa sesi sifo.

"Amagosa wethu athe bhazalala ukuzama ukuthintela ukunaba kwesi sifo, asinakumelana nomonakalo ongaphezu kwalo sele wenzekile,"utsho uDidiza. Ngenxa yale meko ilizwe laseNamibia sele limisele ukwayo ngakwinyama yenkukhu namaqanda aphuma eMzantsi Afrika, oku kuxhalabisa ngamandla. "Esi sifo sihlasela ushishino lenkukhu obelusele lubetheke kakade ngenxa yokumnka kombane okuqhubeka kungaphezi kweli,"utsho uBreitenbach.

Kwinyanga ephelileyo iziko elenza uphando ngezifo zezilwanyana eMelika likhuphe ingxelo yokuba ihlabathi lizakujongana nengxaki yesifo senkukhu.UWilhelm Mare ophuma kumbutho osebenza ngezithinteli kwizilwanyana uthi uMzantsi Afrika awunazo izithinteli zesifo esifana nesi."Kuzakuthatha inyanga ezimbini ukuya kwezintathu ukufumana izithinteli, oku kungenxa yokuba zizakuba zisuka kumazwe angaphandle, ngoko siseza kujongana nayo ixesha elide le meko," kutsho uWilhelm.