UMphathiswa wezoThutho noKhuseleko loLuntu uXolile Nqatha usikhalimele kabukhali isenzo sabaqhubi beeteksi abagada abantu abazihayikhelayo kuba bengafuni kusebenzisa iiteksi.

UNqatha ebethetha ngoLwesine kule veki eRegent eQuigney eMonti kwindibano ebitshis’ ibunzi neenkokheli zeSouth African National Taxi Council (Santaco). Injongo yendibano ibikukubuyisela ubumbano, intsebenziswano kwanokusombulula ingxaki yokungaboni ngasolinye kweziseko zeeteksi.

“Ndenze umzekelo ngomqhubi weeteksi waseDutywa kutshanje obevalele abantu ekubeni bangahayikhi, uza kusifunda isifundo kuba sakurhoxisa nezixhobo zakhe zokusebenza kwaye sele esuka nakwizigwegwe. Ndifuna ukuyiveza ukuba akukho namnye unoteksi onelungelo lokuhlukumeza abantu abafuna ukukhwela iimoto ezincinci,” utshilo uNqatha.

UNqatha uchaphazele nomkhwa owenze laduma kakubi eli phondo leMpuma Koloni, oonoteksi abazibandakanya kwinto yokufuna intlawulo ngenkani (extortion) kwanokusebenzisa kakhulu izibham nto eyenza impalalo-gazi, esithi eso sisenzo esingavumelekanga nesingamkelekanga.

UNobhala Jikelele kwiSantaco, uDaki Qumbu, uthi oku kwenzeka eziteksini kubangela uloyiko kubakhweli nanjengoko beziva bengakhuselekanga. Uthi babone lufanelekile ungenelelo ukunqanda oku.

Uqhube wathi nabanye abantu ababekade beneeteksi barhoxa kuba bengenzingeniso kwaye besoyikisela nobomi babo.

Uthi bazokwenza kangangoko ukuqinisekisa ukuba bayasebenzisana noRhulumente ukuqinisekisa uzinzo nocwangco.

UMongameli weBorder Alliance Taxi, uSongezo Mphanda, uthi, uyavuya kude kwaba kufikelelwa kwesi sigqibo namhlanje (ngoLwesine). Uthi uSantaco kuzwelonke uwunikile umkhombandlela. Uthi ukusukela ngoku iingingqi ziza kuqalisa ukulungiselela ulonyulo oluzayo.

USekela Sihlalo weSantaco eMpuma Koloni, uMxhosa Sobazini, uthi babona kunyanzelekile ukuba isigqibo soMphathiswa uNqatha besihloniphile esokuzama ukubuyisela ubumbano phakathi kwale mibutho yeeteksi. Uthi nangona kungelulanga kodwa baza kuzama ekwathi bakwamkele nokuchithwa kweqela elikade likhona.

Kwinyanga ezayo kulindeleke ukuba kubanjwe inkomfa konyulwe iinkokheli ezintsha.

#taxi

UNqatha utyityimbisele umnwe oonoteksi abazilawulayo!