Nanjengoko uMphathiswa wezeziMali KwaZulu-Natal uFrancois Rodgers elungiselela ukwenza uhlahlo lwabiwo mali kwiveki ezayo, uKumkani uMisuzulu kaZwelithini uvakalise ukuba ufuna kwakhiwe ibhotwe elitsha kunye kongezwe neemoto ngurhulumente wephondo.

Oku kudizwe ngummeli wale Kumkani, uNkosana uGumbela Zulu emva kwendibano yakhe neKumkani ngoLwesithathu.

UZulu uthi iKumkani yamxelela ukuba ibhotwe elitsha kwanezithuthi ezongezelelweyo eziza kunceda kwezi zikhoyo, zizinto eziphambili kuye kulo nyaka.

UZulu uthi iKumkani ikwanqwenela ukuba urhulumente ancedise ekwakheni ibhotwe laseMashobeni elingagqitywanga ePongola kumntla-mpuma wephondo – uMisuzulu sele ewuqalile lo msebenzi ngemali yakhe.

Kungoku nje iNdlunkulu yaseMashobeni inooronta abambalwa abafulelwe ngengca kwaye ngethuba kuqhutywa imbizo yakutshanje yokuxoxa ngemiba yeThala neNgonyama Trust, usapho lwasebukhosini kuye kwafuneka luxhome iintente zokuhlalisa iindwendwe zabo. Iindleko kulindeleke ukuba zifikelele kwizigidi ngezigidi zeerandi.

“IKumkani sele iqalile ukwakha ibhotwe layo elitsha ngemali yayo, kungoko ifuna urhulumente aligqibezele. IKumkani ikwavakalise inkxalabo yokunqongophala kwezithuthi zayo ngoko ke ifuna uMphathiswa ongeze ezinye iimoto,” utshilo uZulu.

Kunyaka ophelileyo, iKumkani yabelwa izigidi ezingamashumi asixhenxe anesixhenxe eerandi (R77 million), nto leyo ehle ngezigidi ezibini zeerandi (R2 million) xa kuthelekiswa nonyaka ogqithileyo.

Oku kwakungqamene namanyathelo karhulumente angqongqo.

Ukhuseleko lobuqu lweKumkani nalo lusandula ukucuthwa, ngenxa yamanyathelo angqongqo awayenyanzeleke urhulumente wephondo ukuba awaphumeze.

Kunyaka ophelileyo, iKumkani yalurhoxisa uhambo lwayo oluya eMalawi ngomzuzu wokugqibela emva kokuba urhulumente wephondo engazange avume ukuthwala iindleko zamabutho amalunga namakhulu amathathu iKumkani ebifuna ukuhamba nawo.

Urhulumente wephondo ukwajongene nemicimbi yenkcubeko yeKumkani equka usuku lweKumkani uShaka olubanjwa minyaka le kunye nemisitho yomhlanga.

#misuzulu-zulu

UKumkani uMisuzulu ufuna ibhotwe neemoto kurhulumente waseKZN