Usapho lwalowo wayesakuba nguMongameli weli loMzantsi Afrika, uJacob Zuma, lukhuphe isilumkiso kunina womntwana wakhe uNonkanyiso Conco, lusithi makahlukane nokukhupha iinkcukacha ezithe ngqo neziyimfihlo ngobudlelwane babo esidlangalaleni.

Oku kuza emva kokuba kusanda kusasazeka iividiyo ezininzi zikaConco, ediza iinkcukacha ngobudlelwane bakhe bangaphambili noZuma, nosele eyinkokeli yombutho uMkhonto weSizwe Party (MKP).

Banomntwana oyinkwenkwe oneminyaka emithandathu ubudala.

Kwenye yeevidiyo, uConco obekwinkqubo kamabonakude iReal Housewives of Durban, uchaze ngeenkcukacha zokudibana kwakhe okokuqala noZuma, owayeseyintloko yelizwe ngethuba bedibana.

"UJZ [Zuma] linene. Ukuqala kwam ukumtyelela, salala ebusuku, yaye ngentsasa elandelayo, wavuka ekuseni kakhulu. Ebesele ehlambile xa ndivuka. Uvakalise uchulumanco kuba ndimndwendwele," utshilo uConco kwenye yeevidiyo.

Iinkcukacha ezithe zadizwa malunga nezinto ezenzeke phakathi kwabo bucala zibangele umdla kumajelo eendaba kunye nengxoxo-mpikiswano eluntwini, abaninzi beqikelela malunga nobume bobudlelwane babo kunye nefuthe elinokuthi libe nalo kwilifa likaZuma.

Kudliwanondlebe olukhethekileyo neDaily News, umninawa kaZuma, uKhanya, naye ohlala eNkandla, uvakalise inkxalabo malunga nokudizwa esidlangalaleni kwemicimbi yabucala yomntakwabo.

"Okokuqala nokuphambili, akulunganga ukuba nawuphi na umntu oneke izinto eziyimfihlo ezenzeka kwigumbi lokulala kwihlabathi liphela. Akulunganga kwaphela. Makayiyeke lento ayenzayo. Ndithetha njengobhuti wakhe [uZuma]. Andiyithandi into ayenzayo [uConco]," utshilo uKhanya.

Uthi izenzo ezinjalo "ziyayijongela phantsi imilinganiselo yentsapho" yaye zaphula "intembelo nentlonipho" emele igcinwe phakathi kwabantu ababethandana ngaphambili.

Ugxininise ukuba nangona imiba yobuqu inokuvela kulo naluphi na ubudlelwane, ukuyipapasha kunokubenzakalisa abo babandakanyekayo kunye nabantwana babo.

"Siyaqonda ukuba iimvakalelo kunye nokuziva buhlungu ngamanye amaxesha kunokukhokelela abantu ukuba bathethe phandle, kodwa kubalulekile ukuba sihloniphe ubumfihlo bomnye nomnye," utshilo uKhanya.

Uthe: "Oku akukho malunga nokwenzeka kudala, kumalunga nokukhusela isidima sabo bonke abantu ababandakanyekayo, ingakumbi umntwana wabo."

UZuma waziwa ngokugada izinto eziphathelele kwimicimbi yakhe yobuqu ukuba zingavezwa eluntwini.

UKhanya uthe: "Umntakwethu usoloko ezama ngandlela zonke ukugcina imicimbi yakhe kude noluntu. Andithi makangathethi ngemicimbi yakhe yezothando, kodwa makubekho indlela enentlonipho yokwenza oku. Awungekhe uxelele umhlaba wonke ngezinto ezenzeka kwigumbi lakho lokulala nje ngaphandle kwesidingo," utshilo.

UKhanya uthe akakawuvezi lo mcimbi kuZuma, uthe: "Ndiza kuthetha naye xa engaxakekanga ngalo mba ubalulekileyo."

Kwenye yeevidiyo uConco ubanga ngelithi uZuma wahlawula ilobola.

Umama womntwana kaZuma [uConco] akakaphenduli kwisilumnkiso sosapho ebesibhengezwe esidlangalaleni. Nangona kunjalo, iingxelo zakhe zamva nje kumajelo eendaba sele zinyuse amashiya, abanye bethekelela ngezizathu zakhe zokwabelana ngeenkcukacha zabucala.

UZuma akakaphenduli ngokuthe ngqo ngale meko. Nangona kunjalo, uKhanya uvakalise ukuba banqwenela ukuwusingatha ngokuzolileyo lo mba ngaphandle kokuxhwitha-xhwithana esidlangalaleni.

Okwangoku, lo mba utsale umdla kumajelo eendaba kunye noluntu loMzantsi Afrika, uninzi lulandela ngolangazelelo okuza kwenzeka. Njengoko uxinezeleko lusanda, kusaza kubonakala ukuba lo mba uza kusonjululwa bucala na okanye ezinye izinto ziza kuvela kwezi veki zizayo.

Iinzame zokunika uConco ithuba lokuphawula azikhange ziphumelele njengoko ifowuni yakhe ibikhala ingaphendulwa ingene kwivoicemail.

IDaily News ikwazamile ukufumana isithethi seMKP, uNhlamulo Ndhlela, ukuba naye aphawule kodwa khange aphendule ngexesha lokupapashwa kweli nqaku.

DAILY NEWS

#jacob-zuma

Usapho lukaZuma lulumkisa umama womntwana wakhe ongena sifuba