Umbongo: Abo ububathwele

Wez’ ebunile okwegusha kuwe!

Wez’ ejweda okomhlolokaz’ ophelelwe lithemba.

Wez’ elil’ okwenkedam’ engenabani.

Waphalaz’ imbilini yakhe kuwe.

Wazilum’ uzilahla ngaye,

Waziqamangel’ ematyaleni ngaye.

Wantywila de wavela ngenwel’ enye.

Namhl’ unuk’ umzondo kuye.

Namhl’ unomdintsi netyheneba kuye.

Aph’ akhoy’ uyakugqwalisa.

Uyinja hawu kuye! Ulutshab’ olurhubuluzayo kuwe!

Unga uyakukhotha abe ekuxathula.

Ukuvulel’ izabatha nemigibe.

Asingomntu ongamaziyo okutyumz’ intliziyo.

Ngulowo ubumkhoth’ amanxeba ngomhla ngeengxaki.

Ngulowo wamvulel’ izandla mhla laligqutha!

Ngulowo wabalikhusi kuye ngomhla ngeengxingongo!

Ngulowo wazibhakaxa kuye umthemba.

Mdekel’ itafile akhukhala kuwe.

Thath’ amany’ akugxoga ngawo wakh’ indlu yakho.

Isithokothoko sandulel’ ukukhanya.

Izikhohlel’ akuthi gulukutyu ngazo, Mazityibilik’ okomnt’ onxib’ isikhwehle.

Ungavum’ ukutshintshwa ziinkqwithelo.

Ath’ amaXhosa kukhonkothw’ ehambayo,

Emiley’ iyachanyelwa.

Yim’ uthi ngxi okomthi womsedare.

Ubeyimvoc’ okomdubi phezu kwesiziba.

Um’ uthi gogololo! Ndee xhaxhe!

NguAnelisa Thengimfene