UMBUNGU ENGQONDWENI
Ndimana ndikhuza ndisithi tyhini,
Okungathi ndingumntu wasetyhini.
Ndimana ndizibuza ndisithi, ‘Yhini!
Ingaba yintw’ esiya kude siyithini?’
Ithiwani na le ntlungu,
Isiphumo sembandezelo phantsi komlungu?
Nith’ iya kuz’ igabuke na le nkungu,
Ukuz’ ingqondw’ ingaphind’ ibe nombungu?
Bathi namhlanje makuphinde kuphath’ iBhulu.
Ngaphambili babethe malikhutshw’ iBhulu.
Nanko ke lo mbungu!
Wenze umntu wanguphunguphungu.
Uphunguphungu sisiphukuphuku,
Walatha ngapha, aphind’ alathe ngaphaya.
Oku ukwenza kub’ engazi,
Ukwenza kub’ engazi ukuba ziph’ iinkomo.
Ave ndiwucekisa ke lo mbungu.
Sisiqhamo sembandezelo phantsi komlungu.
Wafika kweli njengesivunguvungu,
Washiy’ indod’ endal’ inguphunguphungu,
Ibhal’ icim’ isenz’ isizungu.