Nkosi Ndabezintle Mhlontlo

Nkosi Ndabezintle Mhlontlo!!! PHANDULWAZI....

AmaGcina akhahlela gombulelo ongazenziyo kwizinyanya ngokubolekwa iqhawe elinjangawe.

Unobulumko obungaqhelekanga obuquka izakhono ezininzi.

Uzigqamise ngentlakanipho ngokuthanda amasiko nezithethe zikaNtu. Ushiya umzila oyakuba ngunaphakade kuzwe lonke ngokumilisela isidima nentlonipho yobukhosi obufanele ukulawula ngesiNtu.

Uyithandile impucuko yoluntu kunye nemfudo ngokubanzi.

Umfutho wakho uyavakala kumaziko ezemfundo, amazwi akho ayankenteza ezingqondweni zengqondi nezifundiswa ezininzi.

Indlu eMnyama ilahlekelwe luthando nezakhono ubuzibeke elubala ngokuthanda inqubela lophuhliso eluntwini jikelele.

Ubukwanguye umzekelo wokuba iinkokheli zezopolitiko zingakwazi ukusebenza zingalindele ntlawulo ngamaxesha wonke.

Siyayazi ukuba ubusela obuqhubeka kumaziko wombuso norhulumente bekukwenza unyukelwe yiswekile.

Uzinikezele ukulwela ilizwe noluntu ngokubanzi phantsi kwezopolitiko.

Ubuthandazwe bakho busukela uselidyongwana ungena isikolo, ukuya kwiiYunivesithi zade zambini kweleNtshona Kapa, uyokuqhina kumbutho olawula namhlanje....uphela ungomnye wooCeba balo mbutho kurhulumente wokuqala.

Uphikisile amaxesha amaninzi ucebisa kumbuso ophetheyo ngezilima ebeziya zibhentsa ngokubhentsa kumbutho wabantu.

Ukhalile ukhala usemgxunyeni kungekho ufuna ukuva. Usixelela ngolwamvili lomonakalo owenzekayo kooMasipala owawungekho xana babesekwa....asafuna ukumamela......

Uhamba intliziyo yakho ibuhlungu njengelungu lombutho omtsha uMkhonto weSizwe Party owabakho kuwo ekusekweni kwawo njengenye yeeNkosi ezazinomvandedwa lubhudamo oluqhubeka kumbutho wabantu nawo owasekwa ziiNkosi.

Imibutho emininzi yeeNkosi ilahlekelwe yinkokheli, ngumcebisi, ingqondi yemveli.

Apha kokwenu kumaGcina ushiya iTyhopho Patho Royal Family eyiyo eyangamele izindlu zamaGcina wonke imathontsi xhaphetshu kukuxilonga indledlana zokuphilisa abantu kumhlaba kaTyhopho.

Uyishiya iTyhopho Patho Royal Family njengoSihlalo wayo iphuma kakuhle kwisimo esinkenenkene solawulo ingena kubumbano lwamaGcina jikelele.

Ungumtwan' oMhle kubanye, uliqabane "Comrade" kwabanye, uliqhawe lophuhliso kwabanye....

Ngalo lonke ixesha ubulithemba kwabasweleyo......

Aaaaahh PHANDULWAZI....

Khothama mntanomhle, lala ngoxolo Comrade, Xhamela, Wena wesizukulwana sikaTyhopho......

Ngombhali

UBongani Mankewu nguMlawuli weziko i- Infrastructure Finance Advisory Institute (InfraFIN). Ukwalilungu lophando kwiYunivesithi yaseNelson Mandela, nowaseka icandelo le-Infrastructure Development and Engagement Unit (ID&EU), kwakule yunivesithi.

*Ezi ziimbono zombhali kwaye azimelanga ezo zeli phephandaba I’solezwe lesiXhosa.