Temba Bavuma (Aa! Mdengephini!)
Ukapteni weProteas uTemba Bavuma ephethe indebe yeICC World Test Championships ebhiyoza noogxa bakhe emva kokuphumelela bedlala neAustralia.
Image: GLYN KIRK / AFP
Sisiqwengana sengqungqumban’ esingangothinti weqakamba.
NguMdengephini lokuqhokr’ iapile laseJava.
NguTemb’ esikade sisithi siyamthemba.
NguBavum’ esikade sisithi siyamvuma.
Nants’ intonga yeICC isiza noCamshol’ omdakasholo,
Intw’ ezalana neenyos’ intw’ eligumasholo.
Mhl’ abuyayo neqela lakh’ uza kuva ngentsholo,
Intshol’ etsholo phezulu yabantwana besikolo.
Bevuyel’ ukubona la ntong’ imbombosholo.
Mabaphind’ abagxeki bathethe laa nto bebeyitheth’ izolo!
Namhla bathokombis’ iintloko bathe xhonkxosholo.
Soze baphinde baphum’ izithuba betheth’ umbolo,
Besith’ uBavum’ uchongwa nje kub’ engumdakasholo,
Bedlisela ngobuhlag’ iintw’ ezingenaxolo!
Mdengephini wakwaLanga nelakho lide lafik’ ilanga.
NjengoGxiya kumbhoxo naw’ uyivalil’ ingxoxo.
Uza kubuy’ emazwen’ ungumkhokel’ oyintshatsheli.
Siyazidla ngawe Mevamhloph’ ondlela zimhlophe.
Siyazingca ngawe Camshol’ ongangoJansen eguqe ngedolo.
Uz’ usiphinde ke Msuthu ngaloo msebenz’ uluncuthu.
Usebenzile Gwaca awuyi kuphind’ ubuy’ uphaca.
Ndingathetha kutshon’ ilanga ngoMdengephini wakwaLanga.
Bye-bye Bhayi!
Ndaya ndaya ndee tyuu!
Tshoniyani!