Wathint’ abafazi, wathinta imbokodo!

Umbhali: Fundiswa Buqwana

Ndiyakhahlela kuni magorhakazi,

Ndiyantyontyela kuwo amaqhawekazi,

Akuvumi ndithule,

Icingo aliwanga kodwa kukhonya nalo undim uMofu,

Ndingathula kanti inkululeko yenu ilele kolusiba lwakowethu,

Ningothuki andizanga ngabubi,

Ningangcangcazeli nam ndingowenani.

Ndibhekisa kuwe mbokodo engabhokodiyo,

Ndijolise kuwe mbokodo engabanjwa ngobhongwana,

Lo mnwe walathe kumakhosikazi angakhokhobiyo,

Yimani ntozakuthi nithi gomololo,

Qinisani umqolo kuba lo mnqantsa unomvambo,

Wubhinqeni ube mfutshane anikaze nibe ngamabhenqe,

Zenza njalo iintombi ezindala ngo1956,

Yiveni ke nani niland' ekhondweni lazo,

Nithanda ningaliqabel' eliqhina nokuba ligcwel' oosomaqhinga,

Funzelan' edabini kakade ningamadelakufa,

Niqinise nasemthandazwwni kuba eli dabi lifuna izikrweqe zakwaThixo.

Amagudlandlu awamisinto qha ande ngomlomo,

Phumani ingqina nenjenjeya ukulanda ubuntu nenkcubeko yethu,

Mhla kwaphatha nina kumhla kwaqal' ukukhanya,

Mhla kwaphatha nina kumhla yagwetyw' indlala,

Mhla kwavakala ilizwi lomfazi kumhla kwaphela ukubulawa kwamabhinqa,

Mhla nazibamba iintambo kumhla kwaphela ukubulawa kweentsana,

Iintwala zethu ziyakuqhuqheka mhla amaqhaji eza nayo eyibambe ngazo zozibini,

Zeningoyiki maqobokazana anikaze nibe zidyongo,

Siyolulile intambo yabande,

Hambani ningemi abanabungozi, baqobise nje ngentshebe,

Qhakazani njengentyantyamb' ehlotyeni,

Qinani ningabi sagqwidiza senikwinqwanqwa eliphezulu,

Iingqondo zabo zigqwetheka lula ngonomathamb' ezantsi,

Sebenzisani ubuqhijili obasetyenziswa nguDilayila kwizibhalo ezingcwele,

Andityali sithole sempixano, ndihlwayela nje imbewu yoxolo nothando,

Umalikulingwane ibe zizenzo ingabi kukuthetha,

Funzelan' edabini ke nina enibamba imela ngobukhali bayo,

Ningabi sajonga ngemva hleze nijike nibe sisimo setyiwa,

Isidima somfazi sisezandleni zenu

Siyaya phambili!