UThabo Bester ucela umngeni ngokubuyiswa eMzantsi Afrika
UThabo Bester ulwa ezinkundleni ngenxa yeemeko ezingqonge ukubuyiselwa kwakhe eMzantsi Afrika, nanjengoko iNkundla ePhakamileyo yaseBloemfontein ibeke umhla omtsha wokuxoxwa kwetyala lakhe.
Image: Screengrab
Nangona iNkundla ePhakamileyo yaseBloemfontein imisele umhla omtsha wokuchotshelwa kwetyala likaThabo Bester kunye nabo atyholwa nabo, kubonakala ngathi uBester uxelisa uGqirha Nandipha Magudumana ekulweni indlela yokubuyiselwa kwakhe eMzantsi Afrika.
Kuthiwa uBester wancediswa nguMagudumana ukuze aqhweshe kwintolongo yaseMangaung kuCanzibe ngonyaka ka2022. Ukuqhwesha kwesi sibini kwafikelela esiphelweni kuTshazimpuzi ka2023 emva kokubuyiselwa eMzantsi Afrika njengokuba bejamelene namatyala ngoku.
Ukusukela ngoko, uMagudumana ebephithene kwidabi lasenkundleni esilwela ukubuyiselwa kwakhe eMzantsi Afrika.
Ngexesha lokuvela kwakhe enkundleni ngoLwesihlanu, uBester uxelele inkundla ukuba ufuna ukufikelela kumaxwebhu athile avela kwiOfisi kaMongameli nobuNtloli boLwaphulomthetho kwakunye neerekhodi zefowuni zoMphathiswa wezoBudlelwane baMazwe ngaMazwe, uRonald Lamola, ukuze alungiselele ukuxoxwa kwetyala lakhe.
Ngenxa yoku, sele enze isicelo kwiNkundla ePhakamileyo yasePitoli. UBester ukwafuna ukufaka isicelo senkxasomali yokubhatala iindleko zasenkundleni.
UBester, Magudumana, Senohe Matsoara, Zolile Sekeleni, Teboho Liphoko, Buti Masukela, Tieho Makhotsa, Zanda Moyo, noJoel Makhetha bajongene nezityholo zobuqhophololo, urhwaphilizo, ukuncedisa ibanjwa ukuba liqhweshe, ukuxhaphaza umzimba, ukutshisa, kunye nokoyisa ingalo yomthetho.
Ityala liza kubuyela enkundleni kweyoKwindla kunyaka ozayo.